காஞ்சியில் மணிமேகலை

காஞ்சியில் மணிமேகலை

மு.நீலகண்டன்  

 

கச்சி ஒரு மூதூர்; காஞ்சிக்கு அருகிலிருந்த ஊர். கச்சி திரையனின் தலைநகர்; காஞ்சி மக்கள் வாழ்ந்த ஊர். கச்சி வணிகத்தால் சிறப்புடன் திகழ்ந்தது; காஞ்சி புலமை வளர்ச்சியால் சிறப்புடன் திகழ்ந்தது. மூதூராகவும், தலைநகராகவும் முதலில் திகழ்ந்தது கச்சி; கல்விச் சிறப்பால் மேன்மையுற்றிருந்த ஊர் காஞ்சி. கச்சியையும், காஞ்சியையும் எந்தவித வேறு பாடுமின்றி மணிமேகலையில் ஒன்றாக உருவாக்கு கிறார் சாத்தனார். காஞ்சியின் பௌத்த மத வரலாற்றைப் புலப்படுத்துவதில் மணிமேகலையின் முக்கியத் துவத்தை இங்கு ஆய்வு செய்யலாம்.

மணிமேகலைக் காப்பியம்

தமிழ்மொழியின் சிறப்புக்கு அடிப்படையாகத் திகழ்வது சங்க இலக்கியங்களாகும். சீவகசிந்தாமணி, சிலப்பதிகாரம், மணிமேகலை, வளையாபதி, குண்டல கேசி ஆகியவை தமிழில் உள்ள ஐம்பெரும் காப்பியங்கள் ஆகும். இவற்றில் வளையாபதி, குண்டலகேசி காப் பியங்கள் குறைபாடு கொண்டவை. முழு அளவில் கிடைக்கப் பெறவில்லை. சீவகசிந்தாமணி, சமணரால் இயற்றப்பட்டது. சிலப்பதிகாரமும் மணிமேகலையும் இரட்டைக் காப்பியங்கள் ஆகும். மணிமேகலை பௌத்த நெறியைப் பின்பற்றிப் படைக்கப்பட்ட தாகும். மேலும் இது சிலப்பதிகாரத்தின் தொடர்ச்சி யாகத் திகழும் காப்பியமாகும்.

மணிமேகலையை இயற்றியவர் மதுரைக் கூல வாணிகர் சீத்தலைச் சாத்தனார். மணிமேகலைக் காப்பியத்திற்கு “மணிமேகலைத் துறவு” என்றும் பெயர் உண்டு. இதனை இயற்றிய சாத்தனார், சிலப்பதிகாரத்தை இயற்றிய இளங்கோ அடிகள் முன்னிலையில் இதனை அரங்கேற்றினார். சாத்தனார், இளங்கோ அடிகள், இவரின் சகோதரர் செங் குட்டுவன் ஆகிய மூவரும் ஒரே காலத்தவர்கள்.

தமிழில் தோன்றிய முதல் சமயக் காப்பியம் மணிமேகலை. மேலும், தலைமை மாந்தரின் பெயரைக் கொண்ட முதல் காப்பியம் மணிமேகலை. மணி மேகலைக்கு இணையான அல்லது துணையான தலைமை மாந்தர் இதில் இடம் பெறவில்லை.

மணிமேகலைக் காப்பியக் காலம்

மயிலை சீனி. வேங்கடசாமி, மணிமேகலைக் காப்பியம் கி.பி.இரண்டாம் நூற்றாண்டில் எழுதப் பட்டதற்கான ஆதாரங்களைச் சுட்டிக் காட்டுகிறார்.

சேரன் செங்குட்டுவனும், மணிமேகலையின் ஆசிரியர் சாத்தனாரும் நண்பர்கள். கண்ணகியின் வரலாற்றைச் சாத்தனார் சொல்லக் கேட்டுக் கண்ணகிக்குக் கோயில் அமைத்தார் சேரன் செங் குட்டுவன். இந்த விழாவுக்கு இலங்கை வேந்தன் கயவாகு என்பவரைச் சேரன் செங்குட்டுவன் அழைத்தார். இவர் கி.பி.171 முதல் 193 வரையிலும் இலங்கையை அரசாண்டார். கயவாகுவின் நண் பனான சேரன் செங்குட்டுவனும், இளங்கோவடி களும், சாத்தனாரும் ஒரே காலத்தவர் என்பது இதன் மூலம் தெரியவருகிறது. எனவே, மணிமேகலைக் காப்பியத்தைச் சாத்தனார் கி.பி.இரண்டாம் நூற்றாண்டின் இறுதியில் இயற்றியிருக்க வேண்டும்.

வட இந்தியாவை குஷான் வம்சத்து அரசர் கனிஷ்கர், கி.பி.120-162 வரை ஆட்சி புரிந்து, பௌத்த சமயத்தைப் பரப்பினார். அவர் காலத்தில் மகா யான பௌத்தத்தை உருவாக்கிய நாகார்ஜுனர், கி.பி. 200-இல் வாழ்ந்தவர் என்று வரலாற்றுப் பேராசிரியர் கீத் (Prof.Keeth) கூறுகிறார். மணி மேகலையில் “சமயக்கணக்கர் தம் திறம் கேட்ட காதையில்”, தமிழ்நாட்டிலிருந்த பல்வகைச் சமயங் களைப்பற்றிக் கூறுகின்ற சாத்தனார், ஹீனயானத் திற்கு மாறுபட்ட கொள்கையை உடைய மகாயான பௌத்தத்தைப் பற்றிக் கூறாதிருப்பது, நாகார்ஜுனரது கொள்கைகள் பரவுவதற்கு முன்பே, அதாவது

கி.பி.இரண்டாம் நூற்றாண்டின் இறுதியில் மணி மேகலை இயற்றப்பட்டிருக்க வேண்டும் என்று புலப்படுத்துகிறது.

கி.பி.200க்குப் பிறகு தமிழ்நாட்டைக் களப்பிரர் ஏறத்தாழ கி.பி.575 வரையில் அரசாண்டார்கள். எனவே, கி.பி.200க்குப் பின்னர் மணிமேகலையும் சிலப்பதிகாரமும் எழுதப்பட்டிருக்க முடியாது. கி.பி.200-க்குள்ளேயே எழுதப்பட்டிருக்க வேண்டும். அதாவது, கடைச் சங்க காலத்திலேயே இயற்றப் பட்டவை என்று பல ஆராய்ச்சியாளர்கள் கூறி யுள்ளார்கள். சங்கச் செய்யுள்களில் பல்லவர்களைப் பற்றிக் கூறப்படவில்லை. அதிலும் சிறப்பாகத் தமிழ் நாட்டு வேந்தர்களை ஆங்காங்குக் குறிப்பிட்டுச் சொல்கின்ற சிலப்பதிகாரமும், மணிமேகலையும் பல்லவ அரசர்களைக் கூறவில்லை. காஞ்சிபுரத்தைத் தலைநகராகக் கொண்டு தமிழ்நாட்டின் வடபகுதியை அரசாண்ட மன்னர்களான பல்லவர்களைப்பற்றிக் கூறப்படாததால், பல்லவர் தமிழ்நாட்டிற்கு வரு வதற்கு முன்னர் “மணிமேகலை” இயற்றப்பட்டிருக்க வேண்டும். காஞ்சிபுரத்தை அரசாண்டவன் சோழ மன்னன் என்றும், அவன் “நலங்கிள்ளி” என்பவன் தம்பி “இளங்கிள்ளி” என்பவன் என்றும் மணிமேகலை கூறுகின்றது. பல்லவர் முதன்முதலில் காஞ்சிபுரத்தைக் கைப்பற்றியது கி.பி.நான்காம் நூற்றாண்டிலென்றும், கி.பி.மூன்றாம் நூற்றாண்டு வரையிலும் சோழர்கள் சோழ நாட்டிலும், தொண்டை நாட்டிலும் வலிமை பெற்றிருந்தார்களென்றும், “குமாரவிஷ்ணு” அல்லது “ஸ்கந்தவர்மன்” என்னும் பெயருள்ள பல்லவ அரசன் தமிழ்நாட்டின் வடக்கிலிருந்து வந்து முதன் முதலில் காஞ்சிபுரத்தைச் சோழரிடமிருந்து கைப் பற்றியது ஏறத்தாழ கி.பி.325 ஆம் ஆண்டென்றும் ஹீராஸ் பாதிரியார் கூறியுள்ளார். எனவே, மணி மேகலையில் கூறப்பட்டுள்ளபடி காஞ்சியை அர சாண்ட மன்னன் சோழர் குடும்பத்தைச் சேர்ந்தவர் ஆவார். ஆகவே, மணிமேகலை கி.பி.இரண்டாம் நூற்றாண்டின் இறுதியில் இயற்றப்பட்டிருக்க வேண்டும் என்பதை விளக்க வேறு சான்றுகள் ஏதும் தேவை இல்லை என்கிறார் மயிலை சீனி. வேங்கடசாமி.

யார் மணிமேகலை

சிலப்பதிகாரக் காப்பியத்தின் தலைவன் கோவலனின் மனைவி கண்ணகி. கோவலனின் காதலி கணிகையர் குலத்தைச் சார்ந்த மாதவி. கோவலனுக்கும், மாதவிக்கும் பிறந்தவள் “மணி மேகலை”. மரக்கலம் உடைந்து, தண்ணீரில் தத்தளித்துக் கொண்டிருந்த தன் முன்னோர்களில் ஒருவனைக் காப்பாற்றிக் கரைசேர்த்தது “மணி மேகலா தெய்வம்”, அந்த தெய்வத்தின் மீது உள்ள பக்தியின் காரணமாகத் தனக்குப் பிறந்த பெண் குழந்தைக்கு “மணிமேகலை” எனப் பெயர் சூட்டினான் கோவலன். கடலில் பயணம் மேற்கொள்ளும் நல்லோருக்கு இடுக்கண் வருமாயின் அவர்களின் துயரைத் தீர்க்கும் கடற்காவல் தெய்வத்தாய் “மணிமேகலா தெய்வம்” ஆகும்.

பிக்குணி மணிமேகலை

சிலப்பதிகாரத்தில் சமணப் பெண்துறவி கவுந்தியடிகள்; மணிமேகலையில் மாதவி, அவரின் மகள் மணிமேகலை பௌத்தத்துறவிகள் ஆவர். இந்த மூன்று பெண்துறவிகளைத் தான் தமிழ் இலக் கியத்தில் முதன் முதலில் காண்கிறோம். “யாம் அறிந்த வரையில், தமிழ்நாட்டில் பெயர்பெற்ற பௌத்த பிக்குணி “மணிமேகலை” ஒருத்தியே என்கிறார் சீனி. வேங்கடசாமி. மணிமேகலைக் காப்பியத்தில் புகார் என்ற பூம்புகார், வஞ்சி மாநகர், காஞ்சி மாநகர் ஆகிய மூன்று நகரங்களில் மணிமேகலை பௌத்த பிக்குணியாக வலம் வருகிறார்.

புகார் நகரில் மணிமேகலை

முதலில், புகார் நகரில் நடைபெற்ற இந்திர விழாவில் மாதவியும், அவள் மகள் மணிமேகலையும் கலந்து கொள்ளவில்லை. அந்நாளில் மணிமேகலை யோடு மாதவி ஆடல் பாடலில் கலந்துகொண்டு ஊர் மக்களை மகிழ்விக்கவில்லை. இவர்கள் விழாவிற்கு வராமை குறித்து ஊரார் வருந்திய நிலையில் பழிச் சொற்களும் பரவின. இந்நிலையில், தன் தோழி வயந்தமாலையிடம் மாதவி கூறுவதாகச் சாத்தனார் மாதவியின் நிலையைச் சுட்டிக் காட்டு கிறார். “பொதுவாகப் பெண்களின் கற்பு மூன்று விதமானது. இதில் முதல் வகையைச் சேர்ந்த பெண்கள், கணவன் இறந்த செய்தி கேள்விப்பட்டதும், அந்த அதிர்ச்சியிலேயே அவர்களும் உயிர்துறந்துவிடு வார்கள். இரண்டாம் வகைப் பெண்கள் கணவனோடு உடன்கட்டை ஏறி இறந்து போவார்கள். மூன்றாம் வகைப் பெண்கள் விதவையாக வாழ்ந்து, பல விதமான துன்பங்களால் தங்களுடைய உடலை வருத்திக் கொள்வார்கள். ஆனால் கண்ணகியோ, இந்த மூன்று நிலைகளையும் கடந்தவள். தன்னுடைய கணவனுக்கு இழைக்கப்பட்ட அநீதியைத் தாங்கிக் கொள்ள முடியாமல் மதுரை மாநகரத்தையே எரித்துவிட்டாள்.” அப்பேற்பட்ட பத்தினி அவள். இந்த மணிமேகலை என்னுடைய வயிற்றில் பிறந்த வளாக இருக்கலாம். ஆனால் இவள் கண்ணகியையும் தன்னுடைய தாயாகவே எண்ணி மதிக்கிறாள். மாபெரும் கற்புக்கரசியான கண்ணகியின் மகளை எப்படி பரத்தமைத் தொழிலில் ஈடுபடுத்த முடியும். எனவேதான் அவளைத் தவ நெறியில் புகச் செய்வதே அல்லாது திருத்தம் இல்லாத பரத்தமைத் தொழிலில் புகுவித்தலை அவள் செய்யச் சார்தல் இல்லை. எனவே, ஐந்து வகையுடைய பெருமைமிக்க கொள் கைகளாகிய 1. கொலை தவிர்த்தல், 2. களவு செய் யாமை, 3. கள்ளுண்ணாமை, 4. காமம் சாராமை, 5. பொய் சொல்லாமை ஆகியவற்றை மேற்கொண்டு தானும், தன் மகள் மணிமேகலையும் துறவுக் கோலம் பூண்டுள்ளோம்” என்றார் மாதவி. (மணி மேகலை 2:40-75). மணிமேகலையின் துறவறத்தை முதன்முதலில் இங்குதான் சாத்தனார் குறிப்பிடு கிறார்.

அமுத சுரபி

மணிபல்லவத் தீவில் புத்த பீடிகையைத் தொழுது அமுத சுரபி என்னும் பாத்திரத்தை மணி மேகலை பெற்றாள். “பசிப்பிணி என்பது ஒருவனது குடிப்பெருமையால் அமைந்த சிறப்பினைக் கெடுக்கும்; பெருமையை அழிக்கும்; கல்வி, அறிவு என்னும் பொருள் துணையையும் கைவிடுமாறு செய்யும், நாணத்தைப் போக்கும்; அழகு மிகுந்த எழிலைச் சிதைக்கும், ஆபரணங்களை அணிந்த மனைவியோடும் பிறருடைய வாயில்களில் நின்று யாசிக்கவும் செய்யும். அத்தகு பாவத்திற்குக் காரணமாக உடைய பசிப் பிணியைத் தீர்த்தவர்கள் அடைகின்ற புகழின் சிறப்பினைச் சொல்லுவதற்கு அடங்காது” என்று தீவ திலகை என்னும் தெய்வம் பசிப் பணியின் தாக்குதலால் அடையும் தன்மையினை மணி மேகலைக்கு உரைத்தாள். அமுத சுரபியைப் பெற்ற மணிமேகலை புகார் நகருக்கு வந்து அறவண அடிகளின் அறிவுரையை ஏற்று பிக்குணிக் கோலம் பூண்டு அமுத சுரபியைக் கையில் ஏந்தி, வீதி வழியே சென்றாள். இதனைச் சாத்தனார் கீழ்க்கண்டவாறு குறிப்பிடுகிறார்.

“பிக்குணிக்கோலத்துப் பெருந்தெரு அடைதலும்,

ஒலித்து ஒருங்கு ஈண்டிய ஊர்க்குறு மாக்களும்”

(மணிமேகலை 15: 57-58)

அது முதல் மணிமேகலை பௌத்தத் துறவிக் கோலம் பூண்டு அமுத சுரபியின் வாயிலாகப் பசித்தோர்க்கு உணவு அளித்தாள்.

வஞ்சியின் மணிமேகலை

பின்னர் வஞ்சி மாநகர் சென்றாள் மணி மேகலை. அங்குக் கண்ணகியின் கோட்டத்தை அடைந்து தன் தாயாகிய கண்ணகியையும், தந்தை யாகிய கோவலனையும் படிவ நிலையில் வணங்கித் துதித்தாள். மணிமேகலை பல்வேறு சமயக் கருத்து களைக் கேட்டறிந்தார். அவற்றுக்கு மாற்றாக எத்தகைய கருத்தினையும் உரைக்கவில்லை மணி மேகலை. ‘பல சமயங்களின் கொள்கைகளைவிட புத்த சமயம்தான் உயர்வானது; வாழ்க்கையைப் பற்றிய பேருண்மைகளை விளக்கக்கூடியது’ என்பது அவளுக்கு அப்போது புரிந்துவிட்டது (என். சொக்கன், மணிமேகலை ப.181, 2002).

காஞ்சியில் மணிமேகலை

வஞ்சி மாநகரில் உள்ள பௌத்தப் பள்ளியை அடைந்த மணிமேகலை, தந்தை வழி பாட்டனாகிய மாசாத்துவானைக் கண்டு வணங்கினாள். அவர் புத்த சமயத்துறவியாகிய நிலையை அறிந்தாள். அவரின் அறிவுரைகளை ஏற்றுக் காஞ்சி நகரை அடைந்தாள் மணிமேகலை. இது முதல் காஞ்சியின் வரலாறு தொடக்கம் பெறுகிறது. காஞ்சியில் கிள்ளியின் தம்பியான இளங்கிள்ளி என்பவன் பசுமையான இலைகளையும் பொன்னென விளங்கும் கிளைகளையும் உடைய போதி மரத்தின் கீழ் அமர்ந்த புத்த பகவானுக்குக் கட்டிய ஆலயத்தை நண்ணி வணங்கிய மணிமேகலை மலர்ப்பொழிலின் கீழ்ச் சென்று தங்கி இருந்தாள். மணிமேகலை அங்கே புத்த பீடிகையின் மீது அமுத சுரபி பாத்திரத்தை வைத்து பசிநோய்க்கு மருந்தாக விளங்கும் உணவை உட்கொள்ளுவதற்கு எல்லா உயிரும் வருமாறு அழைத்தாள். பார்வையற்றோர், காது கேளாதோர், உடல் ஊனம் உற்றோர், பாதுகாப்பு இல்லாதோர், ஊமையர், நோய்ப்பட்டோர், துறவறம் மேற் கொண்டோர், பசிப்பிணியுற்றோர், வறுமையால் வாடுவோர் எனப் பலரும், விலங்கு வகைகளும் எனப் பல்லுயிரும் உணவு அருந்திப் பசிப் பிணியைப் போக்கிக் கொண்டனர் (மணிமேகலை 28: 221 - 230).

மணிமேகலை காஞ்சியில் அறவண அடிகளை வணங்கித் துதித்தாள். அப்போது, அறவண அடிகள் மணிமேகலைக்கு அறிவுறுத்தும் வகையில் பௌத்தக் கொள்கையைச் சாத்தனார் சுட்டிக் காட்டுகிறார்.

9 வகையான போலிகளைப் பற்றியும், அவற்றின் தன்மைகளைப் பற்றியும் விளக்குகிறார்.

1.  பிரத்தியக்க விருத்தம்

2. அனுமான விருத்தம்

3. சுவசன விருத்தம்

4.  உலக விருத்தம்

5. ஆகம விருத்தம்

6. அப்பிரசித்த விசேடணம்

7.  அப்பிரசித்த விசேடியம்

8.  அப்பிரசித்த உபயம்

9.  அப்பிரசித்த சம்பந்தம்

நான்கு வகையான விருத்தங்களைப் பற்றியும் விளக்கினார்.

1. தன்மச் சொரூப விபரீத சாதனம்

2. தன்ம விசேட விபரீத சாதனம்

3. தன்மிச் சொரூப விபரீத சாதனம்

4. தன்மிச் விசேட விபரீத சாதனம்

மேலும் உண்மைப் பொருளைப் பற்றியும், இன்மைப் பொருளைப் பற்றியும் விளக்கினார்.

குற்றம் தவிர்க்க வாழ்க்கை

மணிமேகலை ஏற்கெனவே துறவறம் மேற் கொண்டுவிட்டாள். அடுத்தது, மணிபல்லவத்தில் தன்முற்பிறவி செய்திகளுக்குப் பிறகு அமுத சுரபியைப் பெற்று அதன் மூலம் அவள் தானத்தில் ஈடுபட்டாள்.

அறவண அடிகளின் அருளால் புத்த தர்மத்தின் பெருமைகளையும், ஒழுக்கங்களையும் தெரிந்து கொண்ட மணிமேகலை புத்தர் திருவடிகளிலேயே அடைக்கலமாகச் சேருவதாகத் தீர்மானித்துவிட்டாள். புத்தபிரானின் திருவடிகளை வணங்கி, ‘அவர் சொல்லித்தந்த நெறிமுறைகளின்படி நடப்பேன். குற்றங்களை விலக்குவேன். தவ ஒழுக்கத்தையே என்னுடைய வாழ்க்கையாக ஏற்றுக் கொண்டு வாழ்வேன்’ என்றாள். நெடுநாள் நோற்றுக் கடைசியில் காஞ்சியிலேயே காலமானாள் மணிமேகலை.

நிறைவாக

மணிமேகலை காஞ்சிக்கு வருகை தந்தபோதே அங்குப் புத்தர் கோயில் இருந்ததைக் காட்டுகிறார் சாத்தனார்.

“பைம்பூம் போதிப் பகவற்கு இயற்றிய

சேதியந் தொழுது தென்மேற்காகத்”

- மணிமேகலை 28:175.

இங்குச் சோழ மன்னனால் இந்தப் புத்தர் கோயில் கட்டுவிக்கப்பட்டதைச் சாத்தனார் குறிப் பிடுகிறார். மணிமேகலை காஞ்சியை அடைந்த பின்னர் புத்தமத வழிபாட்டுக்கு ஏற்றவற்றை அமைத்து விழா எடுத்த செய்தியையும் காஞ்சியில் பௌத்தமதம் சிறப்பிக்கப்பட்டதையும் கீழ்க்கண்ட. பாடலடிகள் காட்டுகின்றன.

பண்டை எம்பிறப்பினைப் பான்மையில் காட்டிய,

அங்கு அப்பீடிகை இது என அறவோன்,

பங்கயப்பீடிகை பான்மையின் வகுத்துத்

தீவ திலகையும் திருமணிமேகலா

மாபெருந் தெய்வமும் வந்தித்து ஏத்துதற்கு,

ஒத்த கோயிலுள் அத்தகப் புனைந்து,

விழவும் சிறப்பும் வேந்தன் இயற்ற”

மணிமேகலை 28:209-215

மேலும், பௌத்த மதத்தின் மீது கொண்ட நம்பிக்கைகள் காரணமாக, அதற்கேற்ற செயல் பாடுகளை மன்னனும் புரிந்த தன்மையை மணி மேகலை சுட்டிக் காட்டுகிறது.

“கார்வறம் கூரினும் நீர்வறம் கூராது,

பார் அக வீதியில் பண்டையோர் இழைத்த

கோமுகி என்னும் கொழுநீர் இலஞ்சியொடு

மாமணி பல்லவம் வந்தது ஈங்கெனப்

பொய்கையும் பொழிலும் புனைமின் என்று அறைந்த

தெய்வதம் போயபின் செய்தியாம் அமைத்தது

இவ்விடம் என்றே அவ்விடம் காட்ட”

- மணிமேகலை 28:200-208.

காஞ்சியில் மணிமேகலைச் சிற்பம்

காஞ்சி, பிள்ளையார் பாளையம் என்னும் பகுதியில் “ஸ்ரீ கருகினில் அமர்ந்தவள் அம்மன்” கோயில் உள்ளது. இக்கோயில் தனியாரிடம் உள்ளது.

பரம்பரை தர்மகர்த்தா C.T.M. அப்பாராவ் முதலியார் அவர்களின் பராமரிப்பில் உள்ளது. இக்கோயிலின் சன்னதியில் இரண்டு புத்த சிற்பங்கள் உள்ளன. இவற்றில் ஒன்று தியான நிலையில் உள்ள சிலையாகும். மற்றொன்றில் புத்தர் பூமிஸ்பரிச முத்திரை காட்டுகிறார். இச்சிலைகள் சோழர் காலக் கலையைச் சார்ந்தவை.

12-ஆம் நூற்றாண்டில் இச்சிலைகளை உருவாக்கி யிருக்கலாம் எனக் கருதப்படுகிறது. இரண்டு புத்த சிற்பங்களுக்கு அருகில் “மணிமேகலை”ச் சிற்பத்தின் தலைப்பகுதி மட்டும் காணப்படுகிறது. மணிமேகலைச் சிற்பத்தின் கண், மூக்கு மிகவும் சிறப்பாகவும், பொருத்தமாகவும் அமைந்துள்ளன. உதடுகள் ஆழ்ந்து அழகாக வடிவமைக்கப்பட்டுள்ளன. காதுகள் முறைப்படி நீண்டு காணப்படுகின்றன. தலைமுடி அலங்காரத்துடன் தலையைச் சுற்றி வடிவமைக்கப் பட்டுள்ளது. இந்து முறைப்படி பொது மக்கள் இச்சிலைகளை வழிபட்டு வருகிறார்கள். இக் கோயிலில் ஒவ்வோர் ஆண்டும் பங்குனி மாதம் கடைசி வெள்ளிக்கிழமை நாளில் “லட்சதீபம்” விழா சிறப்பாகக் கொண்டாடப்பட்டு வருகிறது.

காஞ்சியில் மணிமேகலைக் கோயில்

காஞ்சிபுரம், தலைமை மருத்துவமனையைக் கடந்து தொடர்வண்டி நிலையத்திற்குப் போகும் வழியில், “ஸ்ரீ தர்மராஜா திரௌபதி அம்மன்” ஆலயம் ஒன்று உள்ளது. இந்த ஆலயம் மிகவும் பழமையானது. இது முற்காலத்தில் “மணி மேகலை”க் கோயிலாக இருந்தது என்று மரபுவழி நம்பிக்கை ஒன்று நிலவி வருகிறது. திரௌபதி அம்மன் ஆலயம் அமைந்துள்ள பகுதி முன்பு அறப்பணஞ்சேரி என வழங்கப்பட்டது. இங்கு அறவண அடிகள் வாழ்ந்து இருப்பார் என்றும் “அறவாணர் சேரி” என்பது மரூஉச் சொல்லாக அறப்பணஞ்சேரி என வழங்கப்பட்டது என்பதும் அறியலாம். மணிமேகலை என்ற அறச்சொல்லை நினைவுகூரும் வகையில், தற்போது, இந்தத் தெரு “அறம்பெருஞ்செல்வி” என அழைக்கப்படுகிறது.

ஸ்ரீ திரௌபதி அம்மன் கோயில் வளாகத்தில் பழமையான இரண்டு அரச (போதி) மரங்கள் காணப் படுகின்றன. இக்கோயில் சன்னதியின் மற்றொரு புறத்தில், S.V.நடேச முதலியார் என்பவரால் கட்டப் பட்ட “ஸ்ரீ பரஞ்சோதி அம்மன்” ஆலயமும் காணப் படுகிறது. வழிபாட்டு முறைகள் இந்து முறைப்படி நடைபெற்று வருகின்றன. ஒவ்வோர் ஆண்டும் பங்குனி மாதத்தில் திருவிழாக்கள் சிறப்பாக எடுக்கப்பட்டு, வழிபாடு நடைபெற்று வருகிறது.

தற்போது உள்ள தர்மராஜா - திரௌபதி அம்மன் கோயிலில் முன்பு இருந்த மணிமேகலை, புத்த பிக்குணிகள் சிற்பங்கள் உடைக்கப்பட்டு மூன்று கி.மீ. தூரத்தில் உள்ள நத்தப்பேட்டை ஏரி கரையில் போட்டுவிட்டார்கள் என்று கூறப் படுகிறது. உடைந்து, சிதைவடைந்த சிற்பங்களைத் தவிர்த்து, முழு அளவில் உள்ள மணிமேகலை, புத்த பிக்குணிச் சிற்பங்களை ஏரிகரையில் திறந்த வெளியில் வைத்து இந்து முறைப்படி வணங்கி வருகிறார்கள்.

இதன் மூலம், காஞ்சியில், பௌத்த மதத்தின் சிறப்பினை மணிமேகலை மிக ஆழமாகவும், அழுத்தமாகவும் தருகின்றதைக் காண்கிறோம். “தவத்திறம் பூண்டு தருமம் கேட்ட காதை”யில், பௌத்த மதக் கொள்கைகள் காஞ்சியில் எவ்வாறு பரப்பப்பட்டன, வளர்க்கப்பட்டன என்ற செய்தி களையெல்லாம் மணிமேகலையால் அறிந்துகொள் கிறோம். பௌத்தத்தின் எழுச்சியினைக் காட்ட சிறந்ததொரு தலமாக காஞ்சி விளங்கியது என் பதையும் மணிமேகலையில் காண்கிறோம். இந் நேர்வுகளைக் காணும் போது, அன்றைய பௌத்த மதத்தின் செல்வாக்கினைக் கணிப்பு செய்கிறது மணிமேகலை என்பதை அறியலாம்.

பௌத்த மதத்தையும், அதன் கொள்கைகளையும் எல்லோருக்கும் அறிவிக்கவேண்டும் என்னும் நோக்கத்தோடு மணிமேகலை இயற்றப்பட்டதாகத் தெரிகின்றது என்கிறார் மயிலை சீனி. வேங்கட சாமி. வடக்கில் நாளந்தாவும், தெற்கில் காஞ்சியும் பழங்கால பௌத்தவியல் ஆராய்ச்சி மையங்களாகத் திகழ்ந்தன. களப்பிரர்களின் ஆட்சியின் இறுதிக் கட்டத்தில் தமிழக வணிகத்தின் வீழ்ச்சியும், இவ் வணிகம் பேணிப் பாதுகாத்த பௌத்த மதத்தின் வீழ்ச்சியும் ஒருங்கே படிப்படியாகத் தமிழகத்தில் நடைபெற்றன. வைணவம், சைவம் ஆகிய மதங் களின் தாக்குதலை எதிர்கொள்ளமுடியாமல் பௌத்தமும், சமணமும் தவித்தன. சமணமும், பௌத்தமும் செல்வாக்கு பெற்றிருந்த இடங்களில் தமிழகத்தில் சைவமும், வைணவமும் செல்வாக்கு பெற்றன. பௌத்தர்களின் இருப்பிடமான காஞ்சியில் பௌத்தப் பண்பாட்டுப் பெருமை படிப்படியாக நலிந்து சிதைந்தது. பௌத்தம் தொடர்பான ஆவணங்கள் சமயக்காழ்ப்பால் அழிக்கப்பட்டன.

பயன்பட்ட நூல்கள்

வ.த. இராமசுப்பிரமணியம்,       மணிமேகலை (மூலமும்,உரையும்)

புலியூர்க்கேசிகன்,                                 மணிமேகலை (தெளிவுரை)

என். சொக்கன்,                                        மணிமேகலை

முனைவர் கு. பகவதி,                        காஞ்சிபுரம் (கி.பி.6ஆம்நூற்றாண்டிற்கு முன்)

நடன காசிநாதன்,

மா. சந்திரமூர்த்தி,                               காஞ்சிபுரம் மாவட்டத் தடயங்கள்

A.Aiappan,                                                 Story of Buddhism with special

 P.R.Srinivasan,                                         reference to South India

முனைவர் கு. சேதுராமன்,            பௌத்த சமயக் கலை வரலாறு

Dr.K.Sivaramalingam,                              Archaeological Atlas of the  Antique remains of Buddhism   

Dr.G.John Samuel                                      in  Tamil Nadu.

Dr.shu Hikosaka,                                       Buddhism in Tamil Nadu

Collected Papers,                                     A New perspective Publication Division,Institute of Asian Studies,Chennai,1998.

Dr.S.N.Kandaswamy,                                Buddhism as expounded in  Manimekalai

முனைவர்.ஜி.ஜான் சாமுவேல்,உலகளாவிய தமிழாய்வு - ஓர் அறிமுகம்

முனைவர் க. முருகேசன்,         செந்தமிழ்க் கோயிலின்   சிந்தனைச் சிற்பம்

நேர்காணல்                                         நா.சந்திரசேகரன், தலைவர் போதிதர்மா சொசைட்டி, காஞ்சிபுரம்

(உங்கள் நூலகம் டிசம்பர் 2012 இதழில் வெளியானது)

புத்தரின் போதனைகள் -1

புத்தரின் போதனைகள் -1

கரணிய மெத்த சுத்தங்

௦01. தமது ஒரே குழந்தையை, தம் சொந்த வாழ்வை தியாகம் செய்து காப்பாற்றும் ஒரு தாயைப் போலவே,

எல்லா உயிர்களிடமும் எல்லையற்ற அன்பைக்காட்ட ஒருவர் பழகிக்கொள்ள வேண்டும்

02.தவறான கருத்துகளில் வீழ்ந்துவிடாமல், சீலத்தையும் உள்ளுரு நோக்கையும் கொண்டவராய், புலனாசையை அகற்றுகின்ற ஒருவர் மீண்டும் கருப்பைக்குள் பிறப்பெடுப்பதில்லை.

குத்தக பாட - மங்கள சுத்தங்

01.அறிவிலிகளை அகற்றுதலும், அறிஞர்களுடன் கூடுதலும், மரியாதைக்குரிய இடத்தில் மரியாதை தருவதுமான இதுவே மிகவுயர்ந்த அருள் வாழ்த்தாகும்

02.தீமையை நீறுத்தலும் விலக்கலும், போதையுட்டுவனவற்றைத் தவிர்த்தலும், தம்மத்தில் விழிப்பாகவிருத்தலும் ஆகிய இதுவே மிக உயர்வான அருட்பேறு ஆகும்.

மகாவக்கபாலி, 365 கிளாவத்துகதா

எனக்கு சேவை செய்ய விரும்புவோர், நோயாளிகளுக்குச் சேவை செய்யட்டும்

வசல சுத்தங் -1

01.கோபம், பழியுணர்வு, தீய எண்ணம், பொறமை, தவறான கண்ணோட்டம் மற்றும் ஏமாற்றும் போக்கு ஆகியவற்றை உடைய ஒருவனே தீண்டத்தகாதவன் ஆவான்.

02.தாவரங்களுக்கிடையே பல வகைகளும் இனங்களும் உள்ளன

விலங்குகளுக்கிடையே பல வகைகளும் இனங்களும் உள்ளன
பறவைகளுக்கிடையே பல வகைகளும் இனங்களும் உள்ளன
மீன்கள், பூச்சிகள், பாலுட்டிகள் ஆகியவற்றினிடையே
பல வகைகளும் இனங்களும் உள்ளன ஆனால்

மனிதரிடையே - வேறுபாடே இல்லை

ஆளவக சுத்தம்

செல்வவளம் பெற உழைப்பாளியாய் இருங்கள்
செய்யத்தக்கன செய்யுங்கள்
புகழ்பெற - வாய்மையுடையோ ராயிருங்கள்
நண்பர்களை பெற - தாராளமாயிருங்கள்
மெய்யறிவு பெற - அறிவுற்று தம்மத்தை கேளுங்கள்
வேதனையுறாதிருக்க -தன்னடக்கத்தோடு செயல்படுங்கள்
ஈகை, வாய்மை, பொறாமையுடைமை
ஆகியவற்றைக் கைக்கொள்ளுங்கள்

தேரா காதை  

01.தவத்திலும் பிரம்மச்சரியத்தினாலும், புலனடக்கத்தினாலும், மனக்கட்டுபாட்டினாலும் தான் ஒருவர் உன்னதமானவராவார்.

02.அலங்கரிக்கப்பட்ட இந்த உடலை பாரீர்
இது புண்களின் குவியல்
மெலிந்து தளர்ந்து உறுதி யிழந்த ஒரு கட்டி
சிந்தையை வெகுவாய் ஆட்கொள்ளும் இதனில்
இல்லை எதுவும் நீடிப்பதாக!
இல்லை எதுவும் நீடித்திருப்ப தாக

சம்யுத்த நிகாயம்

01 தொடக்கத்திலும் நடுவிலும் முடிவிலும் - தத்துவ வடிவிலும், பயிற்சி வடிவிலும் நன்மை அளிப்பது  தம்மமே.  தங்கள் கண்களுக்கு முன்னே அறியாமையின் ஒரு சிறு திரையே உள்ள உயரினங்கள் தம்மத்தின் தொடர்பில் வரவில்லை என்றால் அவர்களுக்கு பேரிழப்பு ஏற்பட்டுவிடும். 

02.தற்செயல்தாமோ தீச்செயல்தாமோ
நடத்துகின்றானொரு மானுடன் இங்கெனில்
உற்றசொத்தென அவனுக்குள்ளது
உடனவன்கொண்டு செல்வது இவையே

03.நன்னெறி யாண்டுளதோ ஆங்கு மெய்யறிவு உள்ளது
மெய்யறிவு யாண்டுளதோ ஆங்கு நன்னெறி உள்ளது
மீண்டும் மீண்டும் பிறப்பதோ இறப்பதோ
மீண்டும் மீண்டும் சவக்குழி புகுவதோ
தெள்ளிய பார்வையும் தேறிய பாதையும்
நிப்பானம் உய்விக்கும் பிறப்பினை அறுக்கும்

04அறிவுடையோன் எப்போதும் இன்புறுகின்றான்
தனக்குள் முழுமையாய்ச் சுதந்திரம் அடைகின்றான்
புலனாசைகளால் அவன் கறைப்படுவதில்லை
பற்றற்றவனவன் பாதிப்புறுவதில்லை


தீக நிகாய, மகாபரிநிப்பன சுத்தங்

"தோன்றியவை யாவும் மறையும் தன்மை கொண்டதே;
சோர்வுறாது தொடர்ந்து முயற்சி செய்தவண்ணம் இருங்கள்"
          இதுவே புத்தரின் இறுதி வார்த்தைகள் ஆகும்.

மஜ்ஜிமநிகாயம் 140 ஆவது சூத்திரம்
உண்மைகளை உணர்ந்துக்கொள்ள போதனைகள் புத்தரிடமிருந்து வருகிறதா அல்லது வேறு ஒருவரிடமிருந்து வருகிறதா என்று பார்க்கக் கூடாது. அப்போதனைகளில் உண்மை இருக்கிறதா என்று மட்டுமே பார்க்க வேண்டும்

அந்த்தாலக்கண சுத்த

பிணியுறும் போதோ முதுமையுறும் போதோ

உடல் உம்சொல்லைக் கேட்கிறதோ?

"இல்லை இல்லை - அது கேட்பதில்லை"

ஆணையிட்டுப் பிணியை ஒருவன் அகற்றவியலாது
ஆணையிட்டுப் முதுமையினைக் தடுக்கவியலாது
ஆணையிட்டுப் மரணத்தை நிறுத்தவியலாது

ஓவ்வொரு கணமும் மாறும் இவ்வுலகம்
மாறா ஆன்மாவை பெற்றிருப்பதெங்ஙனம்?
அதனால் இயலாது

சுத்த நிபாதம் 4 .6

உண்மையில் வாழ்க்கை மிகச் சிறிய தேயாம்
ஒருவர் நூற்றண்டுக்குள் மடிவது திண்ணம்
உடமைகள் யாவும் விட்டே செல்வார்
எனினும் எண்ணுவர் ' இது எனதென்றே"


ரோசிதச்ச சுத்தம்
நான் போதிப்பன யாவும்

துன்பமும் அவற்றின் துடைப்புமே

மகாமங்கள சுத்தம்

தந்தை தாயாரைப் பெணிடுதலும்

மனைவி மக்களை காத்திடுதலும்

அமைதியான தொழில்கள் யாவிலும்

ஈடுபட்டு வாழ்தலுமான வாழ்வே

பேறுகள் யாவிலும் நற்பேறாகும்

தம்ம பதம்

01.அவன் என்னை கடுமையாக பேசினான், என்னை  அடித்தான்

என்னை  தோற்கடித்தான், என்னிடமிருந்து எல்லாவற்றையும்

எடுத்துக்கொண்டான் என்பன போன்ற சிந்தனைகளுக்கு

அடைக்களம் தரும் ஒருவரிடம் வெறுப்பு தணிவதில்லை. (3) 

02.இந்த உலகத்தில், வெறுப்பை வெறுப்பால்

ஒருபோதும் அணைக்க முடியாது.

வெறுப்பின்மையால் (அன்பு) தான்

அதை அணைக்க முடியும்.

இதுவே நிலையான தர்மமாகும். (5)

03.இல்லனவற்றை உள்ளனவென்றும்

உள்ளனவற்றை இல்லனவென்றும்
தவறிய கருத்தை பேணிடுவோர்கள்

உண்மையை என்றும் அடைவதேயில்லை (11)

04.குறைபட வேய்ந்த கூரைவீட் டுள்ளே

ஊடுருவிப் பெய்யும் மழையினைப் போலே

முறைப்பட மேம்பா டுற்றிடா நெஞ்சில்

ஊடுருவிக் காமம் உட்புகுந் திடுமே. (13)

05.இங்கும் துன்புறுகிறான் பின்பும் துன்புறுகிறான்
இம்மை மறுமை இரண்டிலும் தீயவன்

துன்பம் உறுகிறான் துன்புற்று அழிகிறான்

தன்னுடைய மாசுறு செயல்களைக் கண்டே (15)

06.மனத்தை கட்டுப்படுத்துவது நன்று

மகிழ்ச்சியை அளிப்பது கட்டுடை மனமே (35)

07.புரிந்து கொள்வதே கடினமாம் மனம்,
மிகு நுட்பமானதால், விரும்புமிடம் அதுதாவும்,
அறிவோர் மனம் அடக்குவோ ராக.;
அடங்கிய மனது மகிழ்ச்சியை கொணரும். (36 )

08.மக்களென் உடைமை வளங்களென் உடைமை
முட்டாள் மனிதன் முழங்குவான் இங்ஙனம்

அவனே அவனுக்குரியவன் என்றேனில்
மக்களா உடைமைகள்? வளங்களா உடைமைகள்? (62 )

09.செல்வவள மாற்றத்தால் சிதைவுறா
உள்ளமே வாழ்விற்சிறந்த பேறாகும்
அசைவிலாமல் புயலைத் தாங்கும்
உறுதியான பறைபோல்
அசைவிலாமல் உறுதிகொள்வர்
அறிஞர் போற்றல் தூற்றலில் (81 )

10.ஆயிரம் யுத்தங்களில் ஆயிரக்கணக்கான
மனிதர்களை வெல்பவனை விட
தம்மைத் தாமே வெல்பவன் தான்
மேன்மை வாய்ந்த போர் வீரனாவான். (103)

11.தமது மூத்தோரை இடைவிடாமல்
மதிக்கும் பக்தி இயல்புடையவர்களுக்கு
நீண்ட ஆயுள், அழகு, மகிழ்ச்சி, வலிமை
என்னும் நான்கு பண்புகளும் வளர்கின்றன (109 )

12.நல்லுரை தம்மால் நமக்கென்ன லாபம்

என்றொரு போதும் எண்ணுதல் வேண்டாம்
துளித்துளி நீரால் குவளை நிரம்பும்

துறவியோ தன்மை மதிப்பால் நிறைகிறார்

சிறுகச் சிறுக தான் என்றால் கூட (122)

13.அனைவரும் தண்டனையைக் கண்டு பயப்படுகிறார்கள்,
அனைவரும் மரணத்தைக் கண்டு பயப்படுகிறார்கள்.
ஆதலால், அனைவரையும் தம்மை போல் கருதி,
கொலை செய்யாமலிருப்பீர்களாக!
கொலை செய்வதையும் ஊக்குவிக்காமலிருப்பீர்களாக! (129 )

14.எவரிடமும் கடுங்சொற்களைப் பயன்படுத்தாதீர்கள்.
அவ்வாறு கடுங்சொற்களுடன் பேசினால் மற்றவர்களும் உங்களிடம்
அப்படியே பேசுவார்கள். கோபமும் விவாதமும் உள்ள சொற்கள் துன்பமே. அதன் விளைவாக உங்களுக்கு தண்டனைதான் கிடைக்கும். (133)

15.தனக்கெந்த நன்மையும்
செய்யாத செயலினையும்,
தீமைமிகு செயலினையும்
செய்வது மிக எளிதே;
அனால்
நன்மை பயப்பதையும்
நல்லதையும் செய்வதற்கு
உண்மையில் மிக கடினம் (163)

16.பசியே பெரும் பிணி (203)

உடல் நலமே பெரும் வரவு,

நம்பிக்கை உரியவர்களே உத்தம உறவினர்கள்  (204)

17.பற்றி லிருந்தே துக்கம் உதிக்கிறது

பற்றிலிருந்தே அச்சம் உதிக்கிறது

பற்றினை முற்றும் விட்டவற்கில்லை

துக்கம்; அச்சம்  அதைவிடக் குறைவே (216)

18.சீலம் உள்நோக்கில் நிறைநிலை உற்றவர்,
எவரவர் தம்மத்தில் நிலைத்து நிற்பவர்
உண்மை உணர்ந்தவர் தன்கடன் கழித்தவர்,
இவரே மக்கட் இனிவராம். (217 )

19.வாய்மைகளில் சிறந்தவை - நான்கு உன்னத வாய்மைகளே

வழிகளில் சிறந்தவை - உன்னத எண் வழிப்பாதைகளே
நிலைகளில் சிறந்தது - நிப்பான நிலையே

மனிதரில் சிறந்தவர் - இவற்றை காண்பவரே (273)

20.புத்தர்கள் வழியை மட்டுமே காட்டுவார்கள் (276)

21." கூட்டுப்பொருட்கள் யாவும் நிலையற்றதே ஆகும்"
உண்மையான ஆழ்நோக்குடன் இதை உணர்ந்தறியும்
ஒருவர் துன்பத்திலிருந்து விடுபட்டவர் ஆகிறார்.

இதுவே தூய்மையடைவதர்க்கான வழி. (277)

22.உண்மையாகவே, தியானத்தினால் தெள்ளறிவு (ஞானம்) உதிக்கிறது. தியனமில்லை என்றால், ஞானம் தேய்கிறது.

பெறுவதும் இழப்பதுமாகிய இந்த இருவழிப் பாதையை அறிந்துக்கொண்டு, ஞானத்தை அதிகரிக்கும் வழியில் ஒருவர் தன்னையே வழிநடத்திக் கொள்ளவேண்டும். (282)

23.தம்மத்தின் தானம் அனைத்து தானங்களையும்  வெல்லக்கூடியது

தம்மத்தின்  சுவை அனைத்து சுவைகளையும் வெல்லக்கூடியது

தம்மத்தின் மகிழ்ச்சி அனைத்து இன்பங்களையும் வெல்லக்கூடியது

விருப்பின் (ஆசை யின்) அழிவு அனைத்து   துன்பங்களையும் வெல்லக்கூடியது (354) 

24.பகைவர் இடத்திலும் நட்புடனிருத்தல்

வன்முறைக் கிடையிலும் அமைதியாயிருத்தல்

பற்றுள்ளோர் இடையிலும் பற்றற்றிருத்தல்

உற்றவ உன்னத மனிதர் என்பேனே (406)

தம்மபதம் முழுவதும் பார்க்க கீழ்காணும் தொடர்பை அழுத்தவும்

http://sites.google.com/site/budhhasangham/dhammapadam

புத்த மார்க்க வினா விடை-1,2 and 3 க. அயோதிதாஸ் பண்டிதர் எழுதியது.

புத்த மார்க்க வினா விடை-3

க. அயோதிதாஸ் பண்டிதர் எழுதியது.

01 . புத்தராகிய சற்குரு ஞான நீதிகளைப் போதித்து வந்தார் என்பதில் ஞானம் என்பதின் பொருள் என்ன?

ஞானம் என்பது அறிவு என்னும் பொருளைத் தரும். அஃது சிற்றறிவு என்றும் பேரறிவு என்றும் இரு வகைப்படும்.

02. சிற்றறிவு என்றும் பேரறிவு என்றும் இரு வகை அறிவுகள் உண்டோ?

உண்டு, அதாவது, சிறு வயதுள்ள மனிதன் என்றும் பேரு வயதுள்ள மனிதன் என்றும் தேகியை (தேகத்தை) குறிப்பது போல அறிவினிடத்திலும் விருத்தி பேதத்தால் இரு வகைகள் உண்டு.

03. சிற்றறிவு என்பது என்ன?

தங்கள் மனதை வீண் விஷயங்களில் செல்லவிடாமலும், தேகத்தைச் சோம்பல் அடையச்செய்யாமலும், உலோகங்களால் செய்யுங் கருவிகளையும், மரங்களால் செய்யுங் கருவிகளையும் கண்டுபிடித்து, உலகில் உள்ள சீவராசிகளுக்கு சுகம் உண்டாக்கி வைப்பது அல்லாமல், தங்களையும் தங்களை அடுத்தோர்களையும் குபேர சம்பத்தாக வாழ்விக்கச் செய்யும் ஓர்வகை உத்திக்கு சிற்றறிவு என்று கூறப்படும்.

04. அவ்வகை சிற்றறிவினால் கண்ட வித்தைகள் எவை?

பஞ்சை நூலகத் திரிப்பதும், நூலை ஆடையாக்குவதும், மண்ணிற் பலன் உண்டாக்குவதும், மண்ணை இரும்பாக மாற்றுவதும், இரும்பை இயந்திரங்களாக்குவதும், இயந்திரங்களால் புகைரதம், புகைகப்பல், மின்சாரதந்தி, மின்சார ரத முதலிய சூத்திரங்களை உண்டு செய்வதேயாம். இவ்வகை சிற்றறிவுடையவனை சூஸ்திரனென்றும், சூத்திரனென்றும் கூறப்படும். இதுவே விருத்தி ஞானமாம்.

05 பேரறிவு என்பது என்ன?

சீவராசிகளாகக் தோன்றும் யாவும் அநித்தியம் (நிலையற்றது) என்று அறிந்து மண்ணாசை, பெண்ணாசை, பொன்னாசை ஆகிய முப்புரங்களையும் அறிந்து எல்லாக் கவலையும் அற்று இருப்பதை பேரறிவு என்றும் சொருப ஞானம் என்றும் உண்மை என்றும் கூறப்படும்.

06 இவ்வகை பேரறிவினால் உலகில் உள்ளோருக்கும் தனக்கும் உண்டாகும் பயன் என்ன?

தனக்கு உண்டாகும் பிறப்பு, பிணி. மூப்பு, மரணம் என்னும் நான்கு வகைத் துக்கங்களை ஜெபித்துக்கொள்வது அல்லாமல் தன்னை அடுத்தவர்களுக்கும் சுகவழியைப் போதிப்பான். இவ்வகை பேரறிவாளனை வடமொழியில் பிராமணன் என்றும் தென்மொழியில் அந்தணன் என்றும் கூறப்படும்.

07 அஞ்ஞனம் என்பது என்ன?

அஞ்ஞனம் என்பது அறிவின் விருத்தி இல்லாமல் என்று கூறப்படும். அதாவது தன்னுடைய அறிவினால் ஒன்றை விசாரித்து தெளியாமல் ஒருவன் சொல்லுவதை நம்பிக்கொண்டு பேசுவது, ஒருவன் எழுதி வைத்திருப்பதை நம்பிநடப்பது ஆகிய செய்கைகளை அஞ்ஞனம் எனபபடும்.

08 உலகத்தில் எழுதிவைத்திருக்கும் வேதங்களும் புராணங்களும் அவற்றின் போதனைகளும் அஞ்ஞனம் ஆகுமோ?

அவைகளை வாசித்த நிலையிலும், கேட்ட நிலையிலும் நிற்பது, கற்கண்டு என்று எழுதியிருப்பதையும் கற்கண்டு என்று போதித்த வார்த்தையும் கேட்டுக்கொண்டு அதை விசாரியாமலும், சிந்தியாமலும், கற்கண்டு கற்கண்டேன்னும் பொருகளை எல்லோரும் காணக்கூடியதாய் இருந்தாலும் அதின் இனிப்பாகிய சுவையை ஒவ்வொருத்தனும் சுவைத்தறிந்துக் கொள்ளக் கூடியவனாக இருக்கிறான்.

09. மெஞ்ஞானம் என்பது என்ன?

வாசித்தவைகளையும், கேட்டவைகளையும் சிந்தித்து தெளிவடைதலும் கற்கண்டு என்பவை எதிலிருந்து உற்பத்தியாகிறது? அதின் நிறம் ஏத்தகையது? அதின் சுவை ஏத்தகையது? என்று தேடி வாசரித்து சுவைத்து அறிந்த நிலையே மெஞ்ஞானம் எனப்படும்.

10. புத்தர் மரணம் அடைந்தார் என்றும், புத்தர் நிருவாணம் அடைந்தார் என்றும் கூறும் படியான இருவகை வார்த்தைகளின் பேதம் என்ன?

துன்பத்திற்கு இன்பம் எதிரிடையாகவும், துக்கத்திற்கு சுகம் எதிரிடையாகவும் இருப்பது போல, மரணத்திற்கு நிருவாணம் எதிரிடையாயிருக்கின்றது. எக்காலத்தும் நித்திரையில்லாமல் விழித்திருப்பவனை போலும், இரவென்பது இல்லாமல் பகலவனாய் இருப்பது போலும், பிறவியை நீக்கி நித்திய ஜீவனானவர்களுக்கு நிருவாணம் அடைந்தோர் என்றும், தேகத்தில் நோய்க்கண்டு பலவகைத் துன்பங்களால் கபமீறி சுவாசம் அடைக்குங்கால் பொருளின் பேரிலும், பெண்சாதி பிள்ளைகள் பெயரிலும் இருக்கும் பாசம் இழுத்து, பெரு நித்திரை உண்டாக்கி அநித்திய சிவனையடைந்து பிறவியின் ஆளானோர்களை மரணம் அடைந்தார் என்றும் கூறப்படும். ஆசாபாச பற்றுகளில் அழுந்தி மரணமடைந்தோர்களுக்கு பிறவியின் துன்பமும், ஆசாபாசங்கள் அற்று நிர்வாணமடைதோர்களுக்குப் பிறவியற்ற இன்பமும் உண்டாம்.

11. நிருவாணம் என்பது என்ன?

பொய்மை ஆகிய தேகத்திக்பேரில் அணைந்துள்ள வஸ்திரங்கள் எல்லாவற்றையும் கழற்றி எறிந்து விடுவதை தேக நிருவாணம் என்றும்; பெண்ணாசை, மண்ணாசை, பொன்னாசை என்று மனதில் அணைந்துக் கொண்டிருக்கும் பற்றுக்களை கழற்றி எறிந்துவிட்டு உண்மையாகிய ஒளியுற்றலை நிருவாண நிலை என்றும், அந்தர நிர்வாணம் என்றும், எல்லோரும் தரிசிக்க உண்மை ஜோதி வானோக்கி எழுதலை மகா பரிநிர்வாணம் என்றும் கூறப்படும். (ஆசை என்னும் இளமையிலிருந்து ஆசையற்று முத்தினான், முத்திபெற்றான், கடைத்தேறினான், மோக்கமுற்றான் நிருவாணமடைந்தான் என்று வழங்கி வருகிறார்கள்) இவ்வகையான சுகவழியை ஆதியில் போதித்தவுரம், அதின் அனுபவமாகிய சுகமுக்தியைக் காண்பித்தவரும், சற்குருவான புத்தராகையால் அவர் போதித்த சுயக்கியான வழியினின்று நிருவாணமுற்ற பின் அடியார்களை ஆதிக்க சமமானவர்கள் என்றும், சமஆதியானார்கள் என்றும், சமாதியானார்கள் என்றும் வழங்கி வருகிறார்கள்.

12. தன்னிற்றானே உண்மை அறிந்து சுகமடைய வேண்டுமேயல்லது பிறரால் யீடேற்றம் உண்டாவதில்லை என்னும் சுயக்கியானத்தைப் போதித்த புத்தரவர்கள் இவ்வுலகத்தில் எத்தனை வருடமிருந்தார்?

சாக்கிய சக்கரவர்த்தி திருமகனாக பிறந்து பதினாறாவது வயதில் அசோதரை என்னும் மலையசன் புத்திரியை விவாகம் செய்து, இருபதாவது வயதில் இராகுலன் என்னும் ஓர் புத்திரனைப் பெற்று, இருபத்தியோராவது வயதில் அரசாங்கத்தையும் தனது பந்துமித்திரரையும் விட்டு அரச மரத்தடியில் நிலைத்து தன்னையறிந்து காமமென்னும் மன்மதனையுங் காலனென்னும் மரணத்தையுங் செயித்து, முப்பதாவது வயதில் உண்மையின்று உலகேங்கும் சுற்றி சுயக்கியான சங்கங்களை ஏற்படுத்தி ஜீவகாருண்ய வாழ்க்கையையிருத்தி விட்டு, எண்பத்தைந்தாவது வயதில் காசியில் கங்கைக்கரை என்று வழங்கும் பேரியாற்றங்கரை பல்லவ நாட்டில் சோதிமயமாக எல்லோரும் தரிசிக்கும்படி நிருவாண திசையடைந்தார்.

13. பிறவி என்பது என்ன?

அணுவிலும் சிறிய சீவராசிகள் கண்களுக்குத் தோன்றும் உருவமாக எழும்புவதைப் பிறப்புபென்றும், அந்த தோற்ற உருவம் அழிந்துவிடுவதை இறப்பென்றும் கூறப்படும். இதில் கண்களுக்கு தோன்றும் தேகத்திற்கு பொய்மையென்றும், அதை தோற்றிவிக்கும் சத்துக்கு உண்மையென்றும், இருவகைகள் உண்டு. இவற்றுள் தேகத்தை தானென்று அபிமானித்திருக்கும் வரையில் பிறவியென்னும் துக்க சக்கரத்தில் சுழன்று திரிவான். தேகத்தை தானல்லவென்று நீக்கி உண்மையாகிய தன்னையறிந்தவன் பிறவியென்னும் துக்க சக்கரத்தை விடுவித்துக் கொள்ளுவது மல்லாமல் தேகனென்று சொல்லும் வார்த்தை நீங்கி தேவனென்று சொல்லும் மேன்மையடைவான்.

14 சிலர் தன் முயற்சியினால் சுகம்பெரும் வழிகளை நம்பாமல் மணி மாலைகளைக் கொண்டு ஜெபித்திருப்பது என்ன?

ஒரு வசனத்தை பலமுறை சொல்வதே ஜெபமாகும். அவற்றுள் எண் வழுவாமல் காக்க மணிமாலையை சுழற்றுவதன்றி மற்றியாதும் இதில் பயனில்லை.

15. கடவுளை வழிபடுவது என்றால் என்ன?

அவர் உலகில் பிறந்து நமக்கு அருளிய நியாயங்களில் நாம் நின்றோழுகுவதே கடவுளை வழிபடுவதேயாகும்.

16 கடவுளை மாத்திரம் நம்பிக்கொண்டு முக்திபெற முடியாதோ?

கடவுள் என்பதற்கு நன்மெய் என்ற பொருளிருக்க அம்மொழியை மட்டும் விசுவாசித்து வாக்கு, மனம், காயத்தால் தீயச்செய்கையில் நிலைப்பவர்க்கு முக்தியே இல்லை.

17 அறிவே ஆனந்தம் எனபதென்ன?

அறிவால் சர்வமும் உணர்ந்து புண்ணியத்தைக் கைக்கொள்வது மக்களின் முதற் பேறாகும் இதனை அறிவின் மயமென்றும் சொல்லப்படும்.

18 . இவைகளை வகுத்தார் யார்?

ஆதியங் கடவுளாகிய சாக்கைய புத்த சுவாமியே.

19 . இவ்வகை பேரானந்த ஞானங்களைப் போதித்த சற்குரு நிருவாண திசையடைந்து எத்தனை வருடமாகிறது?

இந்தகலியுகம் 5057 மன்மத - சித்திரை மாதம் ( மே 1955 ) பௌர்ணமி திதி வரையில் 2499 வருடமாகிறது. (தற்போது சித்திரை மாதம் மே 2011 பௌர்ணமி திதி வரையில் 2555 வருடமாகிறது)

20 . புத்தர் போதித்துள்ள அட்டாங்க மார்க்கத்தில் மனதையடக்க மந்திரங்கள் ஏதேனும் உண்டோ?

உண்டு. மந்திரம் என்பதற்கு ஆலோசித்தல் என்னும் பொருளை தரும் அதாவது, மனமென்னும் சத்துவிழிப்பில் எங்கிருந்து உதிர்கின்றன, நித்திரையில் எங்கு அடங்கின்றன, சொப்பனத்தில் எங்கு விரிகின்றன வென்று ஆலோசித்தல் மந்திரம் எனப்படும்.

21 . மனம் அடங்குவதற்கு தியானமாகிலும் ஏதேனும் உண்டோ?

உண்டு. தியானம் என்பதற்கு கியானம், ஞானமென்னும் பொருளைத் தரும், அதாவது மனதைப் பேராசையிற் செல்லவிடாமலும், பொறமையில் சூழவிடாமலும், வஞ்சினத்தில் நிலைக்கவிடாமலும், காம இச்சையில் விழவிடாமலும், ஜாக்கிரதையாக ஆண்டுவரும் அறிவுக்கு தியானம் எனப்படும்.

22 . மனம் அடங்குவதற்குப் பூசைகள் ஏதேனும் உண்டோ?

இல்லை. பூசையென்பதும், பூசனையென்பதும், பூசலென்பதும் தேகத்தை தடவலென்னும் பொருளைத்தரும். அதாவது கல்வியை கற்பிக்கும் குருவையானாலும், கை தொழிலை கற்பிக்கும் குருவையானாலும், ஞானத்தை போதிக்கும் குருவையானாலும் நெருங்கி அவருடைய கை, கால் முதலிய அவயங்களைப் பிடித்தலுக்கு பூசதலென்று பெயர். இவ்வகை பூசைக்கும் மனதுக்கும் யாதொரு சம்பந்தமில்லை.

23 . அருகமதம் வேறு, புத்த மதம் வேறென்று கூறுகின்றார்களே அதின் விவரம் என்ன?

வட தேசங்களில் உள்ளவர்கள் புத்தரென்றும், தென் தேசங்களில் உள்ளவர்கள் அருகரென்றும் (பல காரியத்திலும் நானகருனல்ல என்றும்) வழங்கி வருகின்றார்கள்.

24 . சமணமதம் என்பது என்ன?

புத்த தருமத்தை அனுசரித்து சங்கங்களில் சேர்ந்து மடத்தில் வாழ்கிறவர்கள் சகல சீவராசிகளின் பேரிலும் அன்புவைத்து சமமனமுண்டாகி வாழ்ந்தவர்கள் ஆகையால் சமனர் என்றும் சமணாள் என்றும் அழைக்கப்பெற்றார்கள்.

25 . சமணர்களை கழுவேற்றி விட்டதாக சொல்லுகின்றார்களே அதின் விவரம் என்ன?

வேட பிராமணர்கள் தங்கள் சீவனங்களுக்காக ஏற்படுத்திக்கொண்ட மதங்களை உறுதி செய்துக் கொள்ளுவதற்கு சிற்றரசர்களையும் பெருங்குடிகளையுங் தங்கள் வயப்படுத்திக் கொண்டு புத்த தருமத்தை அனுசரித்து வந்தவர்களைக் கழுவிலேற்றிக் கொன்றதுமல்லாமல் பலவகை துன்பங்களையும் செய்து வந்தார்கள்.

26 . வேடபிராமணர்கள் இந்தியாவில் மாத்திரமா பௌத்தர்களை கழுவிலேற்றி வதைத்தார்கள் ஏனைய கண்டங்கட்கு போகவில்லையா?

எல்லா கண்டங்கட்கும் குடியேறி அக்கண்டங்களில் சிறந்து விளங்கிய சமணர்களையும் அவர்களை ஆதரித்து வந்தவர்களையும் கழுவிலும், மரத்திலும் கொன்று வேதங்கட்கு சுதந்திரம் பெற்று அவ்வக் கண்டத்தார்களைப் போலவே நிற்கின்றார்கள்.

27 . கழுவிலேற்றி கொன்ற சமணர்கள் நீங்கலாக மற்றவர்கள் எங்கு போய்விட்டார்கள்?

சற்குருவின் அருளினால் வேறு வேறு மதத்தவர்களாகிய அரசர்கள் இத்தேசத்தை வந்து கைபற்றிக்கொண்ட படியால் சமணர்களையும் அவர்களை சார்ந்தவர்களையுங் கொல்லுவதற்கு ஏதுமில்லாமல் பறையர் பறையரென்று தாழ்த்தி வஞ்சிளமென்னுங் கழுவிலேற்றி வதைத்து வருகின்றனர்.

28 . ஜைன மாதம் என்பது என்ன?

புத்தருடைய ஆயிர நாமங்களில் ஜைரரென்னும் பெயரும் அடங்கியிருக்கின்றன. அப்பெயரை வகுத்திக்குங் கூட்டத்தார் புத்த தருமத்திற்கு சிலவற்றையும் வேட பிராமணர்கள் ஏற்படுத்தியிருக்கும் மதக்கட்டுப்பாடுகளிற் சிலவற்றையும் அனுசரித்துக்கொண்டு ஜைத மதத்தரென வழங்கி வருகிறார்கள்.

29 . சின்னசாமி என்ற பெயரும் அதற்கெதிர் பெரியசாமி என்ற பெயரும் பௌத்தர்கள் வழங்குவதின் காரணம் என்ன?

தமிழ்மொழில் (ஜினசாமி) யாகிய புத்தரை சினசாமி சின்னசாமி சின்னச்சாமி என்றும் சாமிகட்கெல்லாம் முதலுமதிகாரியு மானதால் மகாசாமி என்றும் பெரியசாமி என்றும் வழங்குகிறார்கள். இதன் அர்த்தமுணராதார் சாமியில் சின்னதும் பெரியதும் உண்டோ என்று கேழ்க்கிறார்கள்.

வியாழன், ஜூன் 02, 2011

புத்த மார்க்க வினா விடை-2

க. அயோதிதாஸ் பண்டிதர் எழுதியது

புத்த சுவாமி விவரம்

16. தற்காலத்திய வள்ளுவர்கள் ஆகிய சாக்கியர்கள் தங்கள் தெய்வத்தை மறவாது இருக்கின்றார்களா?

தங்களை தங்களே தெரியாதவர்கள் தங்களின் இனத்தை எங் கனந் தெரிந்துக்கொள்வார். ஆயினும் தங்கள் தெய்வத்தை மட்டும் முற்றும் உணராதவர்களாய் சில பெயர்களை மட்டும் விசாரித்து தாங்கள் பறையர்கள் அல்ல, வள்ளுவர்களே! என்று தனித்து இருக்கின்றார்கள்.

17. தற்காலம் வள்ளுவர்களும் பறையர்களும் சம்மந்தப்பட்டு இருக்கிறர்களா?
ஆம். வள்ளுவர்களைக்கொண்டே பறையர்கள் சகல காரியங்களையும் நடத்துகிறார்கள். பறையர்களுக்கு வள்ளுவர்கள் சகல உபகாரங்களையும் செய்து வருகின்றார்கள். ஆகவே பறையர்களுக்கு வள்ளுவர்களும், வள்ளுவர்களுக்கு பறையர்களும் சம்மந்தப்பட்டு இருக்கிறர்கள். நாளிது வரையிலும் பறையர் வள்ளுவர்களைத்தான் "ஐயர்" என்று வழங்குகிறார்கள்.

18. சக்கையர்கள் இவ்வகையாகத் தாழ்த்தப்பட்டு நிலை குலைவதற்கு முகாந்திரம் என்ன?
அன்னிய தேசங்களில் இருந்து இவ்விடம் வந்து குடியேறிய சில சாதியார் தாங்கள் சுய சீவனங்களுக்காக ஏற்படுத்திக்கொண்ட மதக்கோட்பாடுகளுக்கும், புத்தருடைய ஞானநீதிகள் பெரிதும் நேர்விரோதமாய் இருந்தபடியால் புத்த மதத்தை நசித்துவிடவேண்டும் என்னும் கேட்ட எண்ணங்கொண்டு அம்மதத்தைச் சார்ந்து சுத்தசீலத்தில் மேன்மைப் பெற்றிருந்த சாக்கையர்கள் பறையர் என்றும் கீழ்சாதிகள் என்றும் வகுத்து சகல விஷயங்களிலும் தலை எடுக்க விடாமல் நசித்து வருகிறார்கள்.

19. பறையர் என்று வழங்கும்படியானக் கூட்டத்தார் பூர்வ காலத்தில் கல்வியிலும் நாகரிகத்திலும் ஒழுக்கத்திலும் மேன்மை பெற்று இருந்தார்கள் என்பதற்கு ஆதாரம் என்ன?
திருக்குறள், ஞானகுறள், மூதுரை, ஞானவெட்டி, ஞானமதியுள்ளான் சிவவாக்கிய முதலிய நூற்கள் இயற்றி இருக்கும் விவேக முதிர்ச்சியினாலும் சோதிட நூற்களையும், வைத்திய நூற்களையும், ஞான நூற்களையும் பரம்பரையாகத் தங்கள் இருப்பில் வைத்திருந்து தற்காலம் அச்சிட்டு வெளிக்கு கொண்டுவந்த மகத்துவத்தினாலும் கணிதத்திலும் வைதியத்திலும் வித்துவத்திலும் மாறாமல் விருத்தி பெற்றுவரும் அனுபவங்களிலும் இக்குலத்தார் பூர்வ காலத்தில் சிறப்புற்று இருந்தவர்கள் என்பதையும், தற்காலத்திலும் இக்குலத்திலேயே வித்துவான்கள், புலவர் முதலிய சிரோஷ்டர்கள் அதிகரித்திருபதினாலுமே எளிதில் அறிந்துக்கொள்ளலாம்.

20. பறையர் என்று வழங்கும்படி ஆனவர்கள் பூர்வ சக்கிரவர்த்திகளின் வம்ச வரிசையைச் சார்ந்தவர்கள் என்பதற்கு அனுபவ ஆதாரம் என்ன?
சாக்கையர்கள் அன்னிய மதத்தவர்களால் நசுங்குண்டு நிலைகுலைந்து இருந்த போதிலும் தங்கள் விவாக காலங்களில் தலைப்பாகை, நெற்றிச்சுட்டி, அங்கி, நடுக்காட்டு, கேடயம், மார்பதக்கம், வெள்ளைக்குதிரை, வெள்ளைக்குடை, செடி முதலிய பதினெட்டு விருதுக்களுடன் கோலம் வந்து மூகூர்த்தம் நடத்திவரும் அனுபவங்களும் போதுமான ஆதாரமாய் இருக்கின்றது.

21. இன்னமும் இக்குலத்தார் பூர்வ சக்ரவர்த்திகளின் வம்சத்தார் என்பதற்கு ஆதாரம் ஏதும் உண்டோ?
உண்டு, பறையர்கள் மரணகாலங்களில் சவத்திற்கு முன் உயிர் விட்டவன் ஆயுதங்களாம் வாள், கொடி, குடை, கத்தி, முதலியவைகளை ஓர் கொம்பில் கட்டி, மகமேரு என்று தூக்கி வருவதாலும் இக்குலத்தோர் சக்கரவர்த்திகள் என்பதற்கும், மகமேரு மந்திரபிரானாகிய சாக்கைய புத்த பகவான் குலத்தார் என்பதற்கும் சந்தேகமே இல்லை.

22. இவர்கள் வாழும் கிராமங்களுக்கு பெரும்பாலும் சேரி என்று வழங்கி வரும் காரணம் என்ன?
சேர்ந்து வாழும் இடங்களுக்கு சேரி என்று பொருள்படும். இக்கருத்துப் பற்றியே பூர்வ புத்தமத அரசர்கள் வாழ்ந்த இடங்கட்கு சேரி என்று வழங்கி வந்தார்கள். அக்குலத்தைச் சார்ந்த இவர்கள் நாளிது வரையிலும் தாங்கள் வாழும் இடங்களுக்கு சேரி என்றே வழங்குகிறார்கள். இவற்றை ஜீவக சிந்தாமணி, சிலப்பதிகாரம், மேருமந்திர புராணம், சூளாமணி முதலிய காவியங்களில் காணாலாம்.

23. சக்கையகுல சக்கிரவர்த்தியின் வம்ச வரிசையில் பிறந்து உலகு எங்கும் சுற்றி ஞானநீதிகளைப் போதித்து வந்தார் என்பதற்கு ஆதாரம் என்ன?
தற்காலம் உலகத்தில் உள்ள பல திக்குகளிலும் பூமிக்குள் புதைந்து இருக்கும் புத்தரைப்போன்று விக்கிரகங்களும் உலகம் முழுவதும் உள்ள மனுக்களின் மொத்தத்தொகையில் அரையே அரைக்கால் பாகம் புத்த மதத்தவர்கள் இருக்கும் பெரும் தொகையும் அதற்க்கு போதுமான ஆதாரமாய் இருக்கின்றது.

24. அவ்வகை பெருந்தொகை உள்ள புத்த மதத்தவர்கள் எங்கு இருக்கின்றாகள்?
தீபெத், சீனம், பர்மா, ஜப்பான், சையாம், சிலோன், நேபால் முதலிய தேசத்தோர்கள் புத்த மதத்தவர்களாக இருப்பது அல்லாமல் ஆங்கிலேயர், அமெரிக்கர், ஜெர்மனியர், முதலியோர்களில் கல்வியில் சிறப்புற்ற அநேகர் புத்த மதத்தை தழுவி இருக்கின்கிறார்கள்.

25. புத்தர் உலகெங்கும் சுற்றி போதித்து வந்த ஞானநீதிகளால் உண்டான பலன் என்ன?
புத்த மதத்தவர்கள் வாழும் தேசங்களின் சிறப்பும் அவர்களுடைய ஒற்றுமையும் சமாதானமும் ஆறுதலும் இதற்கு பலனாகும்.

செவ்வாய், மே 31, 2011

புத்த மார்க்க வின விடை -1

க. அயோத்திதாஸ் பண்டிதர் எழுதியது

புத்த சுவாமி விவரம்

01. உமது மார்க்கம் என்ன?
   புத்த மார்க்கம்

02. புத்த மார்க்கம் என்பது எப்படி?
   புத்தராகிய சற்குரு ஜகத் ஜோதியாய் தன்னருட் கொண்டு நிர்வாண பெரும்பாட்டையைத் திறந்து அவ்வழியில் தானே முதல் முதல் சென்றதால் அவ்வழிக்கு புத்த மார்க்கம் எனப்படும்.

03. புத்தகம் என்பது என்ன?
   புத்தருடைய நீதிவாக்கியங்களையும் ஞானவாக்கியங்களையும் எழுதி அடக்கி வைத்திருக்குங் கட்டுக்கு புத்தகம் என்று பெயர்.

04. பௌத்தர் என்பது என்ன?
   புத்தர் அறத்தைக் கடைப்பித்தவர்கட்கு பௌத்தர் என்றும் புத்தறர் என்றும் பெயர்.

05. புத்தர் என்பவர் யார்?
   நம்மை ஒத்த மனிதனாக பூமியில் பிறந்து அறிவை விருத்தி செய்துக்கொண்டு உலகத்தில் உள்ள சீவராசிகளுக்கு ஞானம் இன்னது என்றும் அஞ்ஞானம் இன்னது என்றும் விளக்கி சுக வழியைக் காட்டிய ஓர் சற்குரு.

06. இம்மகாத்துமா புத்தர் என்னும் காரண நாமதேயத்தைச் சூடாமுன் என்ன பெயரைக் கொண்டு அழைக்கப்பெற்றார்?
   சித்தார்த்தர் என்று அழைக்கப்பெற்றார்.

07. இவருக்கு சித்தார்த்தர் என்னும் பெயரை ஏன் கொடுத்தார்கள்?
   பூர்வ காலத்தில் இத்தேசத்தை அரசாண்ட முக்கிய அரசர்களுட்கு ஓர் ஆண் குழந்தைப் பிறந்தால் கலிவாகு சக்கிரவர்த்தி கணித்த அறுபது வருடத்தில் பிறந்த வருடத்தையே நாமகரணமிடும் வழக்கப்படி சித்தார்த்தி வருடம் பிறந்த புத்த சுவாமிக்கும் சித்தார்த்தா என்று அழைக்கப்பெற்றார்.

08. புத்த சுவாமியைப் போல முக்கிய அரசர்கள் இவ்வருட நாமத்தை வழங்கினார்களா?
   ஆம். நளவருடம் பிறந்தவனை நளராசன் என்றும் விக்கிரம வருடம் பிறந்தவனை விக்கிரமராசன் என்றும் மன்மத வருடம் பிறந்தவனை மன்மதராசன் என்றும் ஐயவருடம் பிறந்தவனை ஐயராசன் என்றும் வழங்கி வந்தார்கள்.

09. இவ்வகை சித்தார்த்தி என்னும் பெயரை மாற்றி புத்தர் என்னும் பெயரால் அழைக்கும்படி நேரிட்ட காரணம் என்ன?
   இவர் ஓர் சக்கிரவர்த்திக்கு ஏகபுத்திரனாகப் பிறந்து மண் என்றும் பெண் என்றும் பொன் என்றும் வழங்கும் செல்வத்திரள் தனது சுகபோகத்துக்குத் தக்கவாறு இருந்தும் உலகிலுள்ள சீவராசிகளை ஈடேற்ற வேண்டும் என்னும் கருணையினால் அவைகள் யாவற்றையும் துறந்து பலவகையான துன்பங்களை சகித்து சுகவழியாகிய ஞானத்தின் உண்மெய்க் கண்டு போதித்ததால் மெய்யன் என்னும் பொருட்பட பாலி கலையில் (புத்தம்) புத்தா என்று அழைக்கப்பெற்றார்.

10. இவர் எந்த சக்கிரவர்த்திக் குடும்பத்தில் பிறந்தார்?
   சாக்கைய குலத்தைச் சார்ந்த வீரவாகு என்னும் சக்கரவர்த்தியின் வம்ச வரிசையில் சுத்தோதயன் அல்லது மணமுகன் என்று வழங்கும் சக்கரவர்த்திக்கும் மாயாதேவி என்னும் சக்கரவர்த்தினிக்கும் பிறந்தவர்.

11. இவர் தந்தை எந்த தேசத்தை அரசாண்டு வந்தார்?
   மகத நாட்டை சார்ந்த கபிலவசத்து என்னும் பட்டணத்தை அரசாண்டு வந்தார்.

12. தற்காலத்தில் அத்தேசம் எங்குள்ளது?
   நேபாளத்தில் இருக்கின்றது. அதனை வட அயோத்தியாபுரி, சாக்கிய நகர், கயிலாசம், உத்தர கோசலம் என்றும் சரித்திரங்களில் எழுதி இருக்கின்றார்கள்.

13. சாக்கையர்கள் என்றால் என்ன?
   பூர்வகாலத்தில் கிரகங்களைக் கொண்டு வருங்காலம் போங்காலங்களை அறிந்து சொல்லக்கூடிய மேன்மையுள்ள ஓர் கூட்டத்தாருக்கு சாக்கையர், வள்ளுவர், நிமித்தகர், தீர்க்காதரிசி வருங்காலம் உரைப்போர் என்றும் வழங்கி வந்தார்கள்.

14. இவ்வகை சக்கையர் குடும்பத்தில் புத்தர் பிறந்தார் என்பதற்கு ஆதாரம் என்ன?
   அவருடைய சரித்திரங்களும் சாக்கையமுனி என்னும் பெயரும் போதுமான ஆதாரமாக இருக்கின்றது.

15. சாக்கையர் என்று வழங்கும் புத்தருடைய குடும்பத்தார் தற்காலம் எங்கு இருக்கின்றனர்?
   பூர்வகாலத்து அரசர், வணிகர், வேளாளர் என்ற முத்தொழிலாளர்களாலும் சிறப்புற்று இருந்த சாக்கையர்கள் தற்காலம் பறையர் என்றும், பஞ்சமர் என்றும், சாம்பார் என்றும், வலங்கையர் என்றும் தாழ்த்தப்பட்டு நிலைகுலைந்து இருகின்றனர்.

வெள்ளி, பிப்ரவரி 25, 2011

பணம் சேர்க்கும் சுவாமி விவரம்

அயோத்திதாசர் சிந்தனைகள்

சமயம், இலக்கியம் - தொகுப்பு II

தொகுப்பாசிரியர் - திரு ஞான அலாசியஸ்

தந்திர சாமிகளின் செய்கைகளை மந்திர சமிகளாம் பௌத்தர்கள் விளக்கிக் கொண்டு வந்தபடியால் அவர்களை பல வகையாலும் கொல்லவும் பறையர்கள் என்று சொல்லவும் நேர்ந்தது.

இதன் பகரமாய் பௌத்த தன்மம் இத்தேச முழுவதும் நிறைந்திருந்த காலத்தில் சில வேஷ பிராமணர்கள் கூடி ஓர் பேதை அரசனை அணுகி அரசே நாங்கள் விசேஷ யாகம் செய்யப் போகிறோம். அதில் தங்களிடம் உள்ள பொன் ஆபரணம் யாவையும் அணிந்துக் கொண்டு நாங்கள் பூசிக்கும் யாக குண்டலத்தில் குதிப்பீர் ஆனால், அணிந்துள்ள ஆடை 

ஆபரணங்களுடன்  தெய்வலோகம்  சென்று ஆரம்பாஸ்தீரிகள் யோகம் அனுபவிப்பீர் என்றார்கள்.

அதைக் கேட்ட அரசன் அவர்கள் வாக்கை தெய்வவாக்கு   என நம்பி தன்னிடம் உள்ள பொன் ஆபரணம் இரத்தின ஆபரணம் யாவையும் அணிந்துகொண்டு யாக குண்டத்தில் அருகில் வந்து சேர்ந்தான்.

அதே காலத்தில் ஓர் பௌத்த குருவும் அவ்வழியே வந்து யாக குண்டம் எரிவதையும் அரசன் அருகினில் நிற்பதையும் கண்டு அரசே யாது செய்கிறீர்கள் என்றார்.

பௌத்த குருவே, நான் யாக குண்டலத்தில் குதித்து தெய்வலோகத்திற்குப் போகின்றான். அதைக் கேட்ட பௌத்தகுரு அரசே தெய்வலோகத்திற்குப் போகும் வழிகள் யாவும் உமக்கு  நன்றாய் தெரியுமா என்றார்.

பௌத்த குருவே, நான் கண்டதில்லை என்றான். அரசே, உம்மை தெய்வலோகம் போவதற்கு யாக குண்டலத்தில் குதிக்க சொன்னவர்கள் யார் என்றார்.

பௌத்த குருவே, இதோ எதிரில் மந்திரம் செய்து கொண்டிருக்கும் பிரமணர்களே சொன்னார்கள் என்றான்.

அரசே, அப்படியானால் அந்த பிரமணர்களை முதலில் யாக குண்டலத்தில் குதிக்கச் செய்து நீர் பின்பு குதிப்பீர் ஆனால் அவர்கள் முன்பு தெய்வலோகத்தின் வழிகளை காட்டிக்கொண்டே சென்று உம்மை அவ்விடம் விட்டு அவர்கள் இவ்விடம் வந்து சேர்ந்து விடுவார்கள். நீங்களும் சுக யோகத்தில் இருக்கலாம் என்றார்.

அதைக் கேட்ட அரசன் நமக்கும் தெய்வலோகத்து வழி தெரியாது. பிராமணர்கள் முன்பு வழிகாட்டிக் கொண்டு நடப்பது நன்று என்று பிரமணர்களை அழைத்து சாமிகளே தாங்கள் முதலில் யாக குண்டத்தில் குதிப்பீர் ஆனால் நானும் கூடவே

குதிக்கிறேன். என்னை நீங்கள் கூட்டிக்கொண்டு

தெய்வலோகத்தைக் காட்டிவிட்டு இவ்விடம் வந்துவிடலாம் என்றான்.

இதைக் கேட்ட வேஷ பிராமணர்கள் ஆ ஆ இன்று கிடைக்கக் கூடிய இலக்ஷ பொன்னுக்கு மேற்ப்பட்ட ஆபரணங்கள் போய்விட்டது என்று வருந்தி இப் பௌத்த பிக்குவே கெடுத்துவிட்டான் என்று எண்ணி ஏ அரசே, நீர் நீச்சனை அணுகி, நீச்ச வார்த்தைகளைக் கேட்டு நீயும் நீச்சனாகி விட்டீர். ஆதலின் உமக்கு தெய்வலோக சுகம் கிடைக்காமல் போய்விட்டது. போம் போம் என்று கூறி குடிமியை தட்டிக் கொண்டே போய்விட்டார்களாம்.

பக்கம் 98 -99

பவுத்தம் தழுவியவர்களுக்கு கண்டிப்பாக இடஒதுக்கீடு உண்டு''

பவுத்தம் தழுவியவர்களுக்கு கண்டிப்பாக இடஒதுக்கீடு உண்டு''

தலித் முரசு ஆசிரியர் குழு செவ்வாய், 01 மே 2007 16:25

 

சென்னை உயர் நீதிமன்றத்தின் வரலாற்றுச் சிறப்புமிக்க தீர்ப்பு:

.

தமிழ் நாடு அரசுப் பணியாளர் தேர்வாணையம் 28.9.2006 அன்று வெளியிட்ட விளம்பரத்தில், ‘‘ஆதிதிராவிடர் வகுப்பைச் சேர்ந்த ஒருவர் புத்த மதத்திற்கு மாறிய பிறகு, ஆதிதிராவிடர் வகுப்பைச் சேர்ந்தவருக்கு (இந்துக்களுக்கு) அனுமதிக்கப்படுகிற சலுகைகளுக்கு உரிமையுடையவர் ஆக மாட்டார்'' என்று சட்டத்திற்குப் புறம்பாக அறிவித்திருந்தது. இந்த அநீதியைக் களைந்தெறிய, வேலூர் ஊரிசு கல்லூரியின் பேராசிரியர் அய். இளங்கோவன், சென்னை உயர் நீதிமன்றத்தில் 6.11.2006 அன்று மனு தாக்கல் செய்திருந்தார். இவர் சார்பாக, வழக்கறிஞர் டி. அரிபரந்தாமன் வாதாடினார். இவ்வழக்கை, உயர் நீதிமன்றத் தலைமை நீதிபதி ஏ.பி.ஷா மற்றும் நீதிபதி கே.சந்துரு ஆகியோர் அடங்கிய பெஞ்ச் விசாரித்தது. இத்தீர்ப்புரையை 23.11.2006 அன்று, உயர் நீதிமன்ற நீதிபதி கே. சந்துரு வழங்கினார். இத்தீர்ப்பின் முழு பகுதியை, அதன் முக்கியத்துவம் கருதி அப்படியே வெளியிடுகிறோம்.

தமிழ் நாடு அரசுப் பணியாளர் தேர்வாணையக் குழு வெளியிட்ட விளம்பர எண்.084, பவுத்தத்திற்கு மாறியிருக்கிற தலித்துகளுக்கு இழைக்கும் அநீதியைப் பொறுக்க இயலாமல், சமூக உணர்வுள்ள ஓர் ஆங்கிலப் பேராசிரியரான மனுதாரர் இந்த மனுவை தாக்கல் செய்துள்ளார்.

‘இந்து' உள்ளிட்ட அனைத்து முன்னணி நாளிதழ்களிலும் 28.9.2006 அன்று, தமிழ் நாடு அரசுப் பணியாளர் தேர்வாணையம் வெளியிட்ட இந்த விளம்பரம் வெளிவந்துள்ளது. இவ்விளம்பரம், தமிழ் நாடு தலைமைச் செயலகத்திலும், தமிழ் நாடு அரசுப் பணியாளர் தேர்வாணையத்தின் அலுவலகத்திலும் உதவியாளர்கள் பணிக்கும், தமிழ் நாடு தலைமைச் செயலகத்திலும், தமிழ் நாடு அரசுப் பணியாளர் தேர்வாணையத்திலும் தனி எழுத்தர்கள் பணிக்கும் விண்ணப்பங்களைக் கோரியிருந்தது. தலைப்பு 5(டி) இல் ஒவ்வொரு பதவிக்கும் நேரடித் தேர்வில் இடஒதுக்கீடு பின்பற்றப்படும் என்று சொல்லியிருந்தாலும், விண்ணப்பதாரர்கள் தமிழ் நாடு அரசுப் பணியாளர்கள் தேர்வாணையத்தின் வழிகாட்டு நெறிமுறைகளையும் பார்க்க வேண்டும் என அறிவுறுத்தப்பட்டிருந்தார்கள்.

வழிகாட்டு நெறிமுறைகளின் பத்தி 11 இல் சேர்க்கப்பட்டிருக்கும் குறிப்பில் பின்வருமாறு குறிப்பிடப்பட்டுள்ளது : ‘‘பட்டியல் சாதியைச் சேர்ந்த ஒருவர் பவுத்தத்திற்கு மாறி இருந்தால், இந்து ஆதி திராவிடர் சாதிக்கு வழங்கப்படும் சலுகைகளைப் பெறும் தகுதி அவர்களுக்குக் கிடையாது.''

இது, அரசமைப்புச் சட்டத்திற்கு நேர்ந்த மிக வெளிப்படையான அவமதிப்பாகும். 4.6.1990 நாளிட்ட திருத்தச் சட்டம் 1990 (மத்திய சட்டம் 15, 1990) இன்படி, அரசமைப்புச் சட்டத்தின் பட்டியல் சாதிகள் ஆணை, பவுத்தர்களையும் இணைத்துக் கொள்ளும் வகையில் திருத்தப்பட்டது. அதன்படி பவுத்தர்களாக மாறிய பட்டியல் சாதியினரும் நாடாளுமன்றத்தின் இடஒதுக்கீடு விதிகள் அனைத்திற்கும் தகுதியானவர்கள் ஆவர். இந்திய அரசு இந்த ஆணையை அனைத்து மாநில அரசுகளுக்கும் அனுப்பியது. இந்தத் திருத்தம் நடைமுறைக்கு வந்து 16 ஆண்டுகள் ஆகியும், தமிழ் நாடு அரசுப் பணியாளர் தேர்வாணையம் இன்னமும் தனது தூக்கத்திலிருந்து விழித்துக் கொள்ளாமல், தான் நடத்தும் பல தேர்வுகளுக்கான வழிகாட்டு நெறிமுறைகளைத் திருத்திக் கொள்ளாமல் இருப்பது, மிகுந்த அதிர்ச்சியை அளிக்கிறது.

இந்நிலையில், தமிழ் நாடு அரசுப் பணியாளர்கள் தேர்வாணையம் தனது வழிகாட்டு நெறிமுறைகளின்படி நடப்பது கட்டாயமானது என்றும், அது சட்டப்படியானது என்றும் பல்வேறு நீதிமன்றங்களில் பல்வேறு காலங்களில் வாதிட்டும் இருக்கிறது. எதிர் மனுதாரரான தமிழ் நாடு அரசுப் பணியாளர்கள் தேர்வாணையம், அரசமைப்புச் சட்டத்தின் 315 ஆம் பிரிவின் கீழ் அமைக்கப்பட்டிருந்தாலும், அவர்கள் யாரும் அறிவுறுத்தாமலேயே அரசமைப்புச் சட்டத்தின் பிரிவுகளை நடைமுறைப்படுத்தும் கடப்பாடு உள்ளவர்கள். அதற்கு மாறாக கொடுக்கப்படும் எந்த நெறிமுறைகளையும் ஏற்றுக் கொள்ள மறுக்க வேண்டியவர்கள்.

இருப்பினும், இந்த மனு குறித்த தகவல் ஆணையிலும், இந்த நீதிமன்றத்தால் கேட்கப்பட்டபோதும், தமிழ் நாடு அரசுப் பணியாளர்கள் தேர்வாணையத்திற்காக வாதாடும் வழக்கறிஞர் திரு. சுரேஷ் குமார் இத்தனை ஆண்டு காலமாக, இடஒதுக்கீட்டைப் பொறுத்த வரையில் மாநில அரசின் வேண்டுகோளின் படியே செயல்படுவதாக ஒப்புக் கொண்டுள்ளார். மேலும், 320 ஆம் பிரிவின்படி, மாநில அரசுக்கு ஆலோசனை வழங்கும் அதே நேரத்தில், 3204 ஆம் துணைப் பிரிவின்படி, அரசமைப்புச் சட்டத்தின் 164 ஆவது துணைப் பிரிவின் கீழுள்ள வைகளை செயல்படுத்துவது குறித்தும், 320 ஆவது பிரிவை நடைமுறைப்படுத்த வேண்டிய முறைகள் குறித்தும், தமிழ் நாடு அரசுப் பணியாளர்கள் தேர்வாணையத்தை ஆலோசிக்கத் தேவையில்லை என்பதையும் வழக்கறிஞர் நம் கவனத்திற்குக் கொண்டு வந்துள்ளார். ஆகையால், தங்கள் தேவையை பொருத்தமாக மாற்றி அமைக்கும்படி மாநில அரசுக்கு அறிவுறுத்த வேண்டுமென அவர் கேட்டுக் கொண்டுள்ளார். அப்படி மாற்றினால் எதிர்காலத்தில் அவர்கள் அதற்கேற்றவாறு செயல் பட இயலும் எனவும் தெரிவித்துள்ளார்.

இந்த ஒப்புமையை எங்களால் ஏற்றுக் கொள்ள இயலாது. இந்தச் சூழலில் தலித்துகள் பவுத்தத்திற்கு மாறுவதற்கும், அரசமைப்புச் சட்டத்தில் இது தொடர்பாக செய்யப்பட்ட திருத்தத்திற்கான வரலாற்றுக் காரணங்களையும் நாம் குறிப்பிட வேண்டியுள்ளது. நேருவின் வாழ்க்கை வரலாற்றை எழுதிய மைக்கேல் பிரோஷெரால், அம்பேத்கர் புதிய அரசமைப்புச் சட்டத்திற்கான பிரச்சாரத்தின் தலைமைச் சிற்பியாகவும், இன்னும் சரியாகச் சொல்ல வேண்டுமானால் களத் தளபதியாகவும் வர்ணிக்கப்பட்டார்.

சமூக நீதிக்காக தலித்துகள், பவுத்தத்திற்கு மாறுவதற்கான நடவடிக்கைகளை அவர் மேற்கொண்டார். 3.10.1954 அன்று அகில இந்திய வானொலியில் அம்பேத்கர் பின்வருமாறு அறிவித்தார்: ‘‘என்னுடைய சமூக தத்துவத்தை மூன்று வார்த்தைகளில் அடக்கிவிடலாம்: சுதந்திரம், சமத்துவம், சகோ தரத்துவம். அதனால் நான் பிரெஞ்சு புரட்சியிலிருந்து எனது தத்துவத்தை கடன் வாங்கியதாக யாரும் சொல்ல வேண்டாம். எனது தத்துவத்தின் வேர்கள் மதத்தில் இருக்கின்றதே அன்றி அரசியலில் அல்ல. நான் அவற்றை எனது ஆசான் புத்தரின் போதனைகளிலிருந்தே புரிந்து கொண்டேன். எனது தத்துவத்திற்கு ஒரு நோக்கம் உள்ளது. நான் (பவுத்தத்திற்கு) மத மாற்றப் பணிகளை செய்ய வேண்டும்.''

14.10.1956 அன்று நாக்பூரில் நடைபெற்ற ஒரு விழாவில் 2,50,000 மக்களுடன் அவர் பவுத்தத்தை தழுவிக் கொண்டார். பவுத்தத்திற்கு தீக்ஷை எடுத்த பிறகு அந்த மாபெரும் கூட்டத்தில் உரையாற்றிய அவர், தனது உரையில் மதமாற்றத்தின் கதையையும், அது தன்னிடம் ஏற்படுத்திய தாக்கத்தையும் பின்வருமாறு விளக்கினார் : ‘‘இந்து மதத்தைக் கைவிடும் இயக்கத்தை நான் 1935 ஆம் ஆண்டு நாசிக்கில் தொடங்கினேன். அன்று முதல் நான் அந்தப் போராட்டத்தைத் தொடர்ந்து கொண்டிருக்கிறேன். 1935 ஆம் ஆண்டு இயோலாவில் ஒரு மாபெரும் கூட்டம் நடத்தப்பட்டது. அந்தக் கூட்டத்தில்தான் ஒரு தீர்மானம் மூலம் இந்து மதத்தைக் கைவிடும் முடிவு எடுக்கப்பட்டது. நான் இந்துவாகப் பிறந்திருந்தாலும், ஓர் இந்துவாக இறக்க மாட்டேன் என்று கூறினேன். இந்த மதமாற்றம் எனக்கு மிகுந்த நிறைவையும், கற்பனைக்கெட்டாத மகிழ்ச்சியையும் அளித்துள்ளது. நான் நரகத்திலிருந்து விடுதலை செய்யப்பட்டது போல் உணர்கிறேன்.''

அதே உரையில், அவர் ஏன் பவுத்தத்தைத் தழுவ தேர்ந்தெடுத்தார் என்பதைப் பின்வரும் வரிகளில் கூறுகிறார் : ‘‘உண்மையில் இது (பவுத்தம்) புதியதோ, வெளியிலிருந்து இறக்குமதி செய்யப்பட்டதோ அன்று. பவுத்தமே இந்த நாட்டின் மதம். அது ஈராயிரம் ஆண்டுகளுக்கும் முற்பட்டது. நான் இந்த மதத்தை முன்பே தழுவவில்லை என்பதற்காக வேதனைப்படுகிறேன். புத்தரின் போதனைகள் அழிவில்லாதவை. ஆனாலும் புத்தர் அவற்றை எந்த வித குறைகளுமற்றவை என்று அறிவிக்கவில்லை. புத்தரின் மதம் காலத்திற்கு ஏற்ற வகையில் மாறும் தன்மை உடையது. இது வேறு எந்த மதத்திலும் இல்லாத ஒரு தன்மையாகும்.''

அவர் அரசமைப்புச் சட்டத்தின் 15 மற்றும் 16ஆவது பிரிவுகளில் மிக ஆழமாக செதுக்கிய இடஒதுக்கீட்டின் பலன்கள், வேறு மதத்திற்கு மாறுவதால் மறுக்கப்படலாம் என்பதை உணர்ந்து, தனது மாபெரும் மதமாற்ற உரையில் பின்வருமாறு எழுதினார் : ‘‘வாழ்வியல் பலன்களைவிட சுயமரியாதையே முக்கியமானது. நமது போராட்டம் மாண்பிற்கும், சுயமரியாதைக்குமானது. வெறும் பொருளாதார வளர்ச்சிக்கானது மட்டும் அல்ல.''

இந்த அழைப்பினால், அரசமைப்புச் சட்டம் தங்களுக்கு வழங்கியுள்ள இடஒதுக்கீட்டு உரிமை மறுக்கப்படும் நினைப்பேயின்றி, ஆயிரக்கணக்கானவர்கள் பவுத்தத்தைத் தழுவினர். உண்மையில், மதமாற்றத்தின் தேவையை விளக்கும்போது, தலித்துகளின் பொருளாதார மற்றும் அரசியல் உரிமைகள் மதமாற்றத்தினால் பாதிக்கப்படாது என அம்பேத்கர் வாதாடினார். மேலும், இந்த உரிமைகளைவிட சமூக பலமே தேவை என, அவர் தீண்டத்தகாதவர்களுக்கும், தலித்துகளுக்கும் விடுத்த அழைப்பில் பின்வருமாறு கூறினார் : ‘‘நீங்கள் மனிதர்களாக மதிக்கப்பட, மதம் மாறுங்கள்; ஒன்று சேர மதம் மாறுங்கள்; பலம் பொருந்தியவர்களாக மாற மதம் மாறுங்கள்; சமத்துவம் பெற மதம் மாறுங்கள்; விடுதலை பெற மதம் மாறுங்கள்; உங்களுடைய அன்றாட வாழ்க்கை மகிழ்ச்சியுடன் இருக்க மதம் மாறுங்கள்.''

ஆனாலும், பவுத்தத்திற்கு மாறும் சிக்கல், மதம் மாறிய பவுத்தர்களுக்கு இடஒதுக்கீட்டின் பலன்கள் கிடைக்குமாறு அவர்களின் நலன்களைக் காக்கும் வகையில் அரசை விழிப்புறச் செய்யவில்லை. பல தளங்களில் நடந்த தொடர் பிரச்சாரங்களுக்குப் பிறகு, அரசு இந்தச் சிக்கலில் தனது நிலையை மாற்றிக் கொள்வது சரியென நினைத்தது. இதற்கான யோசனை, அம்பேத்கரின் பிறந்த நாள் நூற்றாண்டான 1990 ஆம் ஆண்டு ஏற்பட்டது. மத்திய அரசு நாட்டின் உயரிய விருதான ‘பாரத் ரத்னா'வை இறப்பிற்குப் பின்னான விருதாக டாக்டர் அம்பேத்கருக்கு வழங்கியது. அதோடு நாடாளுமன்றத்தில் அவரது உருவப்படத்தையும் திறந்து வைத்தது. இது போன்று விழாக்களைக் கடந்து, அம்பேத்கருக்கு உண்மையான இரங்கலைச் செலுத்தும் வகையில், பவுத்தத்திற்கு மாறிய தலித்துகளுக்கு இழைக்கப்பட்டு வந்த அநீதியைத் துடைத்தெறியும் வகையில், அதே பிறந்த நாள் நூற்றாண்டில், அரசமைப்புச் சட்டத்தில் திருத்தம் செய்ய நினைத்தது. இந்த வகையிலேயே மேலே குறிப்பிடப்பட்ட அந்த அரசமைப்புச் சட்டத்திருத்தம் கொண்டு வரப்பட்டது.

மாநில அரசும், அரசமைப்புச் சட்டத்தின்படி உருவாக்கப்பட்ட தமிழ் நாடு அரசுப் பணியாளர் தேர்வாணையமும், கடந்த 16 ஆண்டுகளாக இந்த விசயத்தில் உறங்கிக் கிடந்தது. இதனை எதிர்த்து ஒரு மனு தாக்கல் செய்யப்பட்ட பிறகே விழித்துக் கொள்வதும், தற்பொழுது இதனை நடைமுறைப்படுத்த நீதிமன்ற ஆணையைக் கோருவதும் மிகுந்த அதிர்ச்சியை அளிக்கிறது. தமிழ்நாடு அரசுப் பணியாளர் தேர்வாணையத்திற்காக வாதாடும் வழக்கறிஞர் கோரியிருப்பதைப் போன்ற ஒரு நீதிமன்ற ஆணை தேவையற்றது மட்டுமல்ல, அவர்களின் இந்தக் கோரிக்கை அவர்களுக்கு அளிக்கப்பட்ட அதிகாரத்திலிருந்து அவர்கள் நழுவுவதாகவே ஆகும். தமிழ் நாடு அரசுப் பணியாளர் தேர்வாணையத்திற்காக வாதாடிய வழக்கறிஞரின் வேண்டுகோளை நிராகரிப்பதில் எங்களுக்கு எந்தத் தயக்கமும் இல்லை.

மாறாக, ஒரே எதிர் மனுதாரரான தமிழ் நாடு அரசுப் பணியாளர் தேர்வாணையத்திற்கு நாங்கள் கீழ்க்காணும் ஆணையை வழங்குகிறோம். அவர்களது வழிகாட்டும் நெறிமுறைகளின் பத்தி 11 இல் இணைக்கப்பட்டுள்ள கீழ்க்காணும் வரிகளை நீக்க வேண்டும்.

‘‘பட்டியல் சாதியை சேர்ந்த ஒருவர் பவுத்தத்திற்கு மாறி இருந்தால், இந்து ஆதிதிராவிடர் சாதிக்கு வழங்கப்படும் சலுகைகள் பெறும் தகுதி அவர்களுக்கு கிடையாது.'' மேலும், இந்தத் தவறை சரி செய்தமை குறித்து தமிழ் நாட்டில் அதிகமாக விற்பனையாகும் முன்னணி ஆங்கிலம் மற்றும் தமிழ் நாளிதழ்களில் பொருத்தமான விளம்பரம் அளிக்க வேண்டும்.

தமிழ் நாடு அரசுப் பணியாளர் தேர்வாணையத்தின் யோசனையற்ற செயல்பாட்டால், கடந்த 16 ஆண்டுகளாக நடந்த அநீதியை எங்களால் துடைக்க இயலாத நிலைமை வேதனையானது. இருப்பினும், எதிர்மனுதாரர் தமிழ் நாடு அரசுப் பணியாளர் தேர்வாணையம், உடனடியாக இதே பணிகளுக்கு இன்றிலிருந்து பத்து நாட்களுக்குள், நாளிதழ்களில் சரியான விளம்பரங்கள் மூலம் விண்ணப்பங்களைப் பெற வேண்டுமென தெளிவாக அறிவுறுத்துகிறோம்.

தமிழ் நாடு அரசுப் பணியாளர் தேர்வாணையத்திற்காக வாதாடிய வழக்கறிஞர், முந்தைய விளம்பரத்தின்படி தேர்வுகள் 7.1.2007 அன்று காலை நடப்பதாக முன்பே முடிவாகி விட்டதாகவும், அதற்கான அத்தனை ஏற்பாடுகளும் செய்யப்பட்டு விட்டதாகவும், அதனால் நீதிமன்றம் தேர்வு நாட்களில் மாற்றம் செய்ய வேண்டாம் எனக் கோருவதால், அதில் இருக்கும் சிரமங்களைக் கருத்தில் கொண்டு, அவர்கள் முடிவு செய்த தேர்வு நாளில் நாம் எந்த மாற்றமும் செய்யவில்லை.

இந்தப் புதிய விளம்பரத்தின் அடிப்படையில் வரும் விண்ணப்பங்களையும் பரிசீலித்து, அந்த விண்ணப்பதாரர்களுக்குத் தேவையான நுழைவுச் சீட்டுகளை அவர்கள் வழங்க வேண்டும். மேலும், பழைய விளம்பரத்தின்படி விண்ணப்பித்த பவுத்தத்திற்கு மாறிய பட்டியல் சாதி விண்ணப்பதாரர்கள், இடஒதுக்கீட்டின் கீழ் பரிசீலிக்கப்பட வேண்டுமே அன்றி, அவர்களின் யோசனையற்ற பழைய வழிகாட்டு நெறிமுறைகளின்படி அல்ல.

தமிழாக்கம் : பூங்குழலி